Asllani: Falimenti si pretekst, qeveria i merr nën sqetull bashkitë për të fituar zgjedhjet e radhës

Paralajmërimin e kryeministrit Rama për mundësinë e kalimit me administrator shtetëror për bashkitë në rrezik falimenti, Ylli Asllani, sekretar për pushtetin vendor në Partinë Demokratike, e sheh thjesht si një mekanizëm për përfitim politik në prag të zgjedhjeve vendore të vitit të ardhshëm. Në një intervistë në MCN TV, Asllani tha se nën pretekstin e falimentimit, qeveria i merr nën sqetull për të fituar zgjedhjet e radhës.

Janë 20 bashki në vështirësi të mëdha financiare, dy prej tyre janë në kolaps të plotë, Vora dhe Kavaja. Ky është derivati i gjithë platformës antidecentralizuese të një reforme territoriale që nuk u bë dot administrative. Janë 8 vite që kanë shënuar dëmtimin e vetëqeverisjes lokale.

Sot të zgjedhur vendorë nuk i kanë në dorë kompetenca. Kjo është rrjedhojë e zgjedhjeve të vitit 2019, kur kandidatët nuk dolën nga vota, por thjesht u emëruan.

Nën pretekstin e falimentimit, qeveria i merr nën sqetull për të fituar zgjedhjet e radhës.

Sipas tij, borxhi i trashëguar dhe ai i akumuluar si pasojë e keqmenaxhimit nuk duhen ngatërruar.  

Nuk duhet ngatërruar borxhi që vjen nga kolapsi financiar dhe tjetër borxhi që krijohet. Edi Rama ka trashëguar 65 milionë euro, nuk i tha njeri na ke lënë një mal me borxh. Ky është lloj tjetër borxhi. Vjen nga përllogaritja e kostos së shërbimit. Nuk janë bërë analiza financiare. Këto bashki janë zgjeruar por nuk u është shtuar asnjë fond. Këta kryetarë janë kryetarë të pambështetur financiarisht.

Asllani theksoi më tej se mbështetja e qeverisë për pushtetin vendor është e papërfillshme.

Të gjitha bashkitë në këtë pikë do të shkojnë. Mbështetja që marrin nga buxheti i shtetit është 1% e PBB. Si ka mundësi që me këtë shumë të përballojë gjysmën e problemeve që ka ky vend. Këto janë në pamundësi. Në Shqipëri, bashkitë 75% të buxhetit e marrin nga shteti, por ky nuk është gjithmonë bujar.