Analisti Sami Neza tha në MCN Live se edhe presioni ndaj SPAK-ut nuk duhet parë gjithmonë si negativ. Neza tha se presioni për hetimin e çështjeve zgjedhore ndërton sensibilitete brenda SPAK-ut për trajtimin e tyre.
“Ky është një problem, por SPAK-u duhet të jetë i përgatitur për një presion që i vjen nga institucione të ndryshme. Për sa kohë do preken interesa, do ndalohen interesa, që realizohen duke shkelur ligjet, do ketë edhe sulme, shantazhe ndaj SPAK-ut. Mund të jetë një ndër çështjet e lehta që përballohen nga SPAK.
Duhet shikuar në dy anët kjo çështje. Nëse modulojmë presionin që shkon te SPAK-u, është një qasje e gabuar që s’arrin ta identifikojë mire problemin. Kemi pasur presione dhe kritika ndaj SPAK-ut për procese të veçanta, për prokurorë të veçantë të SPAK-UT. Rasti Veliaj, kritikat e kreut të opozitës ndaj SPAK-ut. Ne s’mund ta modelojmë presionin ndaj SPAK-ut si presion negativ. Kryesisht presionet lidhen me çështje të krimeve zgjedhore, që sipas opozitës duhet të ishin trajtuar nga SPAK-u.
Nuk mendoj se kjo e dëmton SPAK-un, por ndërton sensibilitete brenda SPAK-ut për të trajtuar këto çështje. Në rastin e Veliajt është histori tjetër, është në kushtet e konfliktit të interesit, shantazhit kryesisht mediatik. Kjo është histori tjetër që ndërton penalitete. Efekti i presionit te klima e besimit ndaj SPAk-ut është zero, sepse klima e besimit ka qenë e qëndrueshme. 80 për qind e popullsisë kanë besim te SPAK-u. SPAK-u duhet ta lexojë këtë jo thjesht si besim, por si pritshmëri, dhe nëse nuk realizohen pritshmëritë, është shumë e lehtë të shkallohet besimi”.
Duke folur për hakerimin e materialeve të SPAK, Neza tha se çdo veprim që kryhet në kompjutera lë gjurmë.
I pyetur kush është më i interesuar të ndërhyjë, Neza tha: “Marrja e këtyre dokumenteve mund ta vështirësojë apo lehtësojë, por s’mund ta ndalojë procesin”.
Sipas analistit SPAK s’është i cenueshëm pasi buron nga Kushtetuta dhe kërkon konsensus të gjerë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
