“Xhadat” - QSUT ka paguar 25 milionë lekë mirëmbajtje në dy muaj, për ashensorë që bien

Dy ditë më parë në Qendrën Spitalore Universitare “Nënë Tereza” ashensori i urgjencës ra, ku mbetën të plagosur një paciente 80 vjeç dhe barrelisti.

Sipas të dhënave zyrtare të policisë në komisariatin nr. 4 është shoqëruar tekniku i kompanisë që është kontraktuar nga QSUT, për mirëmbajtje dhe kolaudimin e ashensorëve.

Por sa para ka shpenzuar në këto dy muaj Qendra Spitalore Universitare “Nënë Tereza” për riparim dhe mirëmbajtje ashensori?

Emisioni investigativ “Xhadat” ka hulumtuar të dhënat e thesarit dhe sipas detajimeve për 5 kontrata të lidhura janë harxhuar mbi 25 milionë lekë të vjetër për muajt mars - maj.

Pagesat e këtyre kontratave janë kryer në datat 11 mars, 12 prill, 21 prill dhe në 12 maj.

Por inspektoriati shtetëror i mbikqyrjes së tregut ka informuar se në bazë të inspektimit të kryer, rezulton se për ashensorin e rrëzuar në QSUT është kryer vetëm ekzaminimi fillestar nga një organ i miratuar, por nuk është kryer regjistrimi i ashensorëve në zbatim të Ligjit 10 489 i vitit 2011 “Për tregtimin dhe mbikëqyrjen e tregut të produkteve joushqimore’.

Pra QSUT ka paguar 25 milionë lekë të vjetër për ashensorë të paregjistruar.