Lista Serbe – partia më e madhe e serbëve të Kosovës – njoftoi se nuk do të marrë pjesë në një votim për shkarkimin e kryetarëve shqiptarë të katër komunave me shumicë serbe në veri të Kosovës, i cili është caktuar për 21 prill.
Kreu i Listës Serbe, Zllatan Elek , tha se “qëndrimi i partisë është të mos marrë pjesë në referendumin e thirrur nga Albin Kurti [kryeministri i Kosovës], sepse ai bëri gjithçka që ai të dështojë”.
Elek tha se janë vendosur “procedura të parealizueshme” për votimin e 21 prillit dhe se listat e votuesve “nuk e pasqyrojnë gjendjen reale në terren” dhe se numri i shqiptarëve në listat e votuesve "është rritur".
“Për dy muaj në të gjitha komunat numri i votuesve është rritur në mënyrë disproporcionale, për 433 për qind”, tha ai, por pa sjellë ndonjë provë për pretendimin e tij.
Votimi për shkarkimin e krerëve të komunave Mitrovicë e Veriut, Leposaviq, Zveçan dhe Zubin Potok do të mbahet më 21 prill. Vendimi i KQZ-së erdhi pasi u verifikuan firmat e qytetarëve në peticionet për shkarkimin e kryetarëve të komunave me shumicë serbe.
Mbledhja e firmave u bë pasi qeveria e Kosovës lëshoi një udhëzim administrativ, me qëllim që t'i hapte rrugën shpalljes së zgjedhjeve të parakohshme në komunat e veriut, për shkak se popullata vendase serbe nuk ka pranuar kryetarët shqiptarë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
