Janë rreth 10 mijë viktimat dhe të plagosurit nga armët e paligjshme në Shqipëri. Gjatë një aktiviteti me temë “Mos gjuaj, por duaj”, ministri i Brendshëm, Saimir Tahiri, tha se armëmbajtja pa leje ka mbjellë vdekje në 20 vitet e fundit në vend. Tahiri tha se armëmbajtja pa leje ka nxitur idenë e vetëgjyqësisë, duke bërë që të vriten mijëra njerëz sidomos pas vitit 1997.
“Gjatë 20 viteve miliona ishin armët në duart e qytetarëve. Ne kemi bërë edhe hapa para për të mbajtur larg qytetarin nga armët e paligjshme. Ne jemi ende në sfidën e madhe për të qëndruar sa më larg armëve, sa më afër dijes e kulturës. Sot Shqipëria ka një problem me armët e paligjshme. Ato në mënyrë të padrejtë janë kërcënim i vazhdueshëm për qytetarin dhe shoqërinë. Në përpjekjen tonë 20-vjeçare për të ardhur deri këtu janë dashur deri në 10 mijë qytetarë që kanë humbur jetën ose janë plagosur rëndë nga armët e shpërndara në vitin 1997”, tha Tahiri.
Kreu i Ministrisë së Brendshme tha se armët janë bërë pjesë edhe e modeleve sociale. Tahiri tha se shpesh përdorimi i armës shihet në klipet muzikore apo në fotot e rrjeteve sociale, një kulturë kjo që ka nevojë për ndryshim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
