Turistët zakonisht e imagjinojnë Norvegjinë si vendin e bukur të fjordeve dhe qyteteve piktoreske. Por një reklamë e kompanisë “7-Eleven” e përshkruan atë si “vendi i klamidias” (infeksion seksualisht i transmetueshëm). Reklama për prezervativët nuk është pritur mirë nga autoritetet vendase të turizmit.
Nëse qëllimi i reklamës ka qenë të bjerë në sy, atëherë ia ka dalë me sukses. Videoja e saj shpalos bukuritë e Norvegjisë, duke i shoqëruar në fund me atë që pakkush e pret: rrezikun e sëmundjeve seksualisht të transmetueshme.
Në fakt, nuk është thjesht një video. Kompania ka vendosur postera në stacionin qendror të Oslos, ku mbërrijnë shumica e turistëve që vizitojnë vendin.
Zyrtarët e turizmit thonë se një reklamë e tillë i bën norvegjezët të duken të çmendur pas seksit dhe Norvegjinë ndryshe nga ç’është në të vërtetë. Por një OJQ që merret me çështjet e shëndetit seksual e ka vlerësuar fushatën publicitare.
“Në 2016, në Norvegji janë regjistruar rreth 26 mijë raste me klamidia. Kjo sepse norvegjezët nuk përdorin prezervativin. Sëmundja mund të bëhet nxitje për sëmundje të tjera më të rënda”, thotë Tore Holte Follestad, menaxhere e OJQ-së Sex og samfun.
Ndërsa vetë kompania thotë se me reklamën nuk ka pasur për qëllim të ofendojë asnjë. “Duam thjesht të ndërgjegjësojmë njerëzit në lidhje me këtë çështje”, ka thënë zëdhënësi i 7-Eleven.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
