PD ka vijuar me denoncimin e abuzimeve të tenderave sekretë të qeverisë për blerjen e pajisjeve mjekësore në lidhje me përballimin e pasojave të koronavirusit.
Ish-deputetja e PD-së, Albana Vokshi, ka deklaruar se tenderi sekret i qeverisë për respiratorët është dukshëm një rast i korrupsionit dhe zhvatjes së parave të qytetarëve, pasi rezulton se respiratorët janë blerë me afërsisht dyfishin e çmimit real.
“Një respirator është blerë nga qeveria me gati dyfishin e çmimit të tregut. Një respirator është zhdoganuar me 7.7milionë lekë dhe është blerë nga qeveria me 14 milionë lekë, pra me çmim gati 2 herë më të lartë. Janë këto çmime stratosferike dhe abuzive arsyeja pse Edi Rama i mban këta tendera sekret, duke paguar qindra milionë lekë më shumë klientët e tij në kohën më të vështirë për qytetarët. Vetëm kompanisë TBS 96, që ka shkelur kontratën për respiratorët, qeveria e Edi Ramës i ka paguar nga paratë e shqiptarëve 11 milionë euro në 6 vjet”, deklaroi Vokshi.
Më tutje, ish-deputetja vuri në dukje se tenderi ishte për 54 respiratorë, por kompania ka sjellë vetëm 5 brenda afatit të caktuar në prokurim sekret.
“Kushti kryesor i tenderit ishte koha e shpejtë e sjelljes së respiratorëve. Kompania fituese duhet të sillte 20 respiratorë brenda 7 ditëve dhe të tjerat më vonë. Por kjo nuk ndodhi. Kontrata u shkel në mënyrë flagrante. Dokumentet qe ne kemi siguruar tregojnë se kompania TBS 96 ka sjellë vetëm 5 respiratorë nga 54. Megjithatë qeveria nuk e ka prishur kontratën me të, siç e detyron ligji në raste të tillla. Ka vetëm një arsye që mund të çojë një zyrtar të mos zbatojë ligjin dhe ky është rryshfeti, korrupsioni, vjedhja”, shtoi Vokshi.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
