Air Serbia, nën presionin e opinionit publik, i përmbahet sanksioneve globale dhe redukton fluturimet drejt Rusisë për shkak të veprimeve të saj ushtarake në Ukrainë.
Kështu bën të ditur Qendra për Strategjitë e Transportit (CTS), duke kujtuar se më parë Serbia kishte përgjysmuar numrin e fluturimeve drejt Rusisë, duke i sjellë ato nga 15 në 7 në javë.
Megjithatë, ndërsa vendet e Bashkimit Europian kishin mbyllur qiellin për linjat ajrore ruse dhe kompanitë europiane kishin ndërprerë fluturimet drejt Rusisë, Air Serbia, në mungesë të konkurrencës, kishte vendosur të rrisë ofertën e fluturimeve për në Rusi.
Kjo sjellje e serbëve është pritur me valë kritikash, ku Air Serbia u akuzua se po ndiqte një politikë pasurimi të padrejtë mes vuajtjeve të miliona qytetarëve ukrainas.
“Serbia është e vetmja në Europë që ka qiell të hapur ndaj Rusisë. Të fitosh para me gjak nuk është diçka e denjë për një vend kandidat në BE”, tha zëvendësministrja e jashtme e Ukrainës Emine Dzhaparova.
Vetëm gjatë së hënës, për herë të tretë brenda pak ditësh, u raportua për praninë e një bombe në bordin e avionit të Air Serbisë që operonte në linjën Beograd-Moskë. Në dy rastet e mëparshme, alarmi për bombë rezultoi i rremë. Mediat e Beogradit spekuluan se emailet me alarmet mund të kishin origjinën në Ukrainë, për të dëmtuar Air Serbia, e vetmja kompani europiane që garanton lidhje të drejtpërdrejta me Moskën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
