Në kuadër të vizitës në Berlin, kryeministri Edi Rama është pritur nga ministri i Jashtëm i Gjermanisë, Sigmar Gabriel. Gjatë takimit, Gabriel ka theksuar se Gjermania do ta çojë përpara përafrimin e Shqipërisë me BE. Sipas tij, plani qëndron tashmë në tavolinë. “Ju falenderoj për reformat që jeni duke kryer. Ju falenderoj për angazhimin personal dhe qëndrimin tuaj në qetësimin e konflikteve në vendet fqinje” i ka thënë ai Ramës. Sipas ministrit gjerman, “Në prag të proceseve zgjedhore, reformat nuk janë të thjeshta, por shumica e shqiptarëve dëshirojnë stabilizimin dhe avancimin e mëtejshëm drejt BE-së”. Ai theksoi se Shqipëria ka mundësinë e madhe historike që t’i bashkohet BE. “Europa ka mundësinë të bashkëpunojë me Shqipërinë dhe fqinjët e saj për paqen e stabilitetin. Për këtë, ju jeni një garant” tha ai.
Ndërkohë, Rama ka qenë dje në Berlin i ftuar nga “Fondacioni Friedrich Ebert”. Kreu i qeverisë shqiptare ka mbajtur një fjalim në ‘Eminent Lectures’, ku ka folur për reformat e vendit në rrugën integruese në BE.
“Dje në Berlin i ftuar nga Fondacioni Friedrich Ebert si folës në ‘Eminent Lectures’ për Shqipërinë dhe vendosmërinë tonë në rrugën e reformave europianizuese, për negociatat dhe reformën në drejtësi; si edhe për zhvillimet në rajon e për nevojën që Europa ka për Ballkanin” shkruan Rama në profilin e tij.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
