Reso: Dosjet s’mund të hapeshin nga ish-komunistët! Funksionarë të PD u vendosën qëllimisht me dosje

Ish-deputeti Bardhyl Reso deklaroi në emisionin “Arnautistan” në MCN TV se shumë nga funksionarët e PD janë vënë qëllimisht njerëz që kishin dosje.

Reso theksoi se është gabim i madh që s’u hapën dosjet që në fillim, por shtoi se kjo gjë nuk mund të bëhej nga ish-komunistët.

Dosjet në Shqipëri janë përdorur vetëm për qëllime politike, që s’i kanë shërbyer dekomunistizimit të vendit, por interesave të drejtuesve politikë. Çudia më e madhe është që tamam pinjollët e ish-komunistëve dalin sot dhe japin emra të njerëzve që kanë bashkëpunuar me ish-Sigurimin e Shtetit. Si mund të bëhej hapja e dosjeve në një vend që erdhi demokracia por pushtetin e morën prapë ish-komunistët, si ish-sekretarët e partive. Nxjerrin edhe emra, që gjysma e drejtuesve të PD dalin të gjithë spiuna! Është gabim i madh që s’u hapën që në fillim dosjet. Dosjet i kanë shfrytëzuar në mënyrën më të poshtër. Do t’u them një shembull: Ngarkojnë shërbimin e Gazidedes për të parë pastërtinë e figurës që i kërkonte ‘Doktori’ që t’i emëronte në poste. I marrin dhe i shikojnë, dikush kishte, dikush s’kishte. Gazidedja pasi i shikon emrat e atyre që ishin me dosje në Sigurimin e Shtetit, tha këto emra mos i ço sepse doktori ose do t’i bëjë ose zv.ministra ose drejtorë! Shumë nga funksionarët e PD janë vënë qëllimisht me dosje. Sepse ajo i përmendej. Nuk mund të hapeshin dosjet nga ish-komunistët që erdhën në pushtet”.