Politologu Ilir Kalemaj, e cilëson fyes posterin e Partisë Socialiste, “Vetëm përpara, kurrë më mbrapa”, ku shihet Kryeministri Edi Rama dhe dy rivalët e tij politikë, Sali Berisha dhe Ilir Meta.
Nga studio e MCN Live, ai tha se një ditë më parë ishte me disa kolegë të huaj dhe u përballën me këto postera, duke shtuar se u desh një shpjegim prej çerek ore që tu treguar se këta persona nuk kandidonin për zgjedhjet lokale.
Ky poster është për të treguar që këta janë mbeturina, e shkuara, ndërsa ne jemi të bukur, gazmorë, e ardhmja. Është një spot shumë fyes për një politikë normale.
Ne brenda katundit tonë politiko-mediatik e kuptojmë, por një i huaj jo. Madje edhe premtimet janë për zgjedhje politike.
Lidhur me atë që cilësohet si presion i Kryeministrit, Kalemaj tha se ato bashki që duan, i mbështesin, ndërsa të tjerat që i sheh si të “njerkës” jo.
Ka parë që rrezikon Shkodrën, Kamzën dhe kërcënon. Ai u ka thënë e zeza mbi të bardhë që nëse votoni kandidatin tjetër, nuk iu mbështesim.
I ka kandiduar të gjithë, vetëm Lelin nuk ka rikandiduar. Zoti Rama nuk e fsheh dot që janë në prag falimentimi, por i rikandidon.
Lidhur me largimet nga Shqipëria, Kalemaj deklaroi se nuk po ikin për turizëm, por për azil dhe se Edi Ramën në Angli e pritën për t’i tërhequr veshin, për t’i thënë se Shqipëria nuk është vend në luftë.
Ministrja e Brendshme britanike tha se po na pushtojnë shqiptarët. Pse shqiptarët sot janë dyndur në Tiranë?
Pse është zbrazur Elbasani? Shumica e tyre kanë migrim të brendshëm. Se ju nuk keni politika nxitëse për t’i mbajtur shqiptarët aty ku janë.
Si shpjegohet që në Elbasan ka rënë numri i popullsisë me 40-50 mijë vetë vetëm në tetë vitet e fundit.
Shqiptarët janë detyruar të vijnë në Tiranë, në një fjetore gjigante.
Kur kanë ikur nga Elbasani dhe Vlora, imagjino se çfarë ndodh në fshatra.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
