“Objektivi i Egnatias është Europa”, presidenti Demrozi: Tetova, i vetmi që erdhi me plan të detajuar

Presidenti i Egnatias, Agim Demrozi, deklaroi se kualifikimi në Europë, është objektivi primar i rrogozhinasve në sezonin e ri.

Demrozi zbuloi për emisionin “Skaner” në MCN TV, edhe arsyen, pse zgjodhi Edlir Tetovën si trajner të skuadrës, duke thënë se ishte i vetmi që i erdhi me një plan të detajuar.

Skuadër e vogël nuk jemi, por eksperienca e vitit të parë në Superiore, na bëri të zbresim me këmbë në tokë. Këtë vit kemi bërë zgjedhjet e duhura dhe synojmë Europën. Objektivi primar i Egnatias është Europa. Bashkë me trajnerin kemi zgjedhur lojtarët e duhur, të cilët na kanë bindur. Shpresojmë që më zgjedhjet e bëra, të kapim Europën. Për sa i përket ekipeve të tjera, gara është e gjatë dhe kush ka vullnet dhe dëshirë shkon deri në fund.

Nervozizmi fillon të rritet, por edhe ne me gjyqtarët çfarë të bëjmë?! Gjyqtarët një herë e shikojnë, një herë jo. Njëherë e kemi në favor, njëherë në disfavor dhe nuk më pëlqen të bëjmë polemika.

Zgjodhëm një trajner të ri, sepse ma mbushi mendjen. Ishte i vetmi nga ata që kontaktuam, që erdhi me një plan të detajuar. Jam i bindur që do ecim mirë. Çfarë ka pasur nevojë ekipi, i kemi marrë. Ardhjet janë bërë nga stafi, i kam dhënë besim atyre. Nuk kemi mbaruar me transferimet, presim edhe dy afrime të tjera, në mesfushë dhe në sulm.