Situata e krijuar nga masat kufizuese për parandalimin e koronavirusit ka ngritur shqetësimin e përdorimit të të dhënave personale. Përpunimi i të dhënave personale në situatën aktuale prek sektorë si: punësimi, telekomunikacioni, shëndetësia dhe arsimi. Kjo ka bërë që Komisioneri për të Drejtën e Informimit dhe Mbrojtjen e të Dhënave Personale të lëshojë disa udhëzime lidhur me atë që parashikon ligji në raste të tilla.
Në kushtet kur një numër institucionesh dhe biznesesh vijojnë punën, ndërsa të tjera i angazhojnë punonjësit nga shtëpia, këta të fundit janë subjekt i monitorimit në kuadër të masave parandaluese kundër Covid-19.
Në rastin e parë, ata janë subjekt i kontrollit të vazhdueshëm në lidhje me konstatimin në kohë të simptomave eventuale të COVID-19, si dhe monitorimit me sistemet e video survejimit lidhur me respektimin e masave higjeno-sanitare; ndërsa në rastin e dytë, punëmarrësit e angazhuar nëpërmjet punës në shtëpi apo telepunës, aksesojnë platformat e punëdhënësve nëpërmjet rrjeteve private virtuale (VPN), ose përdorin kanale private komunikimi (si adresat elektronike personale).
Në këto rrethana, Zyra e Komisionerit sqaron se për qëllime të masave kundër COVID-19, parimisht, punëdhënësit mund të përpunojnë të dhëna personale të punëmarrësve (siç janë të dhënat e përftuara nga monitorimi i shtuar i shëndetit të tyre), në sasi dhe cilësi që – në mënyrë të arsyeshme – tejkalojnë përpunimin e zakonshëm të të dhënave në fjalë në kushte normale pune. Përpunimi përfshin jo vetëm mbledhjen dhe ruajtjen e të dhënave të përpunuara lidhur me shëndetin, por edhe transmetimin e tyre tek organet ligjzbatuese të ngarkuara në luftën kundër COVID-19, përfshirë, por pa u kufizuar, organet e autorizuara me ligj për kryerjen e survejancës epidemiologjike (siç parashikohet nga legjislacioni në fushën e parandalimit të sëmundjeve infektive).
Ndërsa sa i takon punës në distancë, Komisioneri sugjeron masa që garantojnë ruajtjen e konfidenciatitetit të punonjësve.
“Përdorimi i rrjeteve private virtuale (VPN), si dhe kanaleve të tjera private të komunikimit, për qëllime të mundësimit punës në shtëpi ose telepunës, si dhe përdorimi i sistemeve të video survejimit për monitorimin e respektimit të rregullave higjeno-sanitare, krahas dispozitave të sipërpërmendura, duhet të shoqërohet edhe me masa tekniko-organizative dhe rregulla strikte që të mund të sigurohet pacënueshmëria dhe konfidencialiteti i të dhënave, në përputhje me nenet 27 dhe 28 të Ligjit për Mbrojtjen e të Dhënave Personale”, thuhet në udhëzim.
Lidhur me mbledhjen dhe përpunimin e të dhënave shëndetësore në kuadër të survejancës epidemiologjike, Zyra e Komisionerit vlerëson se në kushtet aktuale, organet e ngarkuara me marrjen e masave janë ligjërisht të autorizuara t’i përpunojnë të dhënat personale dhe, veçanërisht, ato që lidhen me shëndetin e individëve.
“Përpunimi në fjalë përfshin, ndër të tjera, mbledhjen e të dhënave të nevojshme në lidhje me realizimin e survejancës epidemiologjike, ruajtjen e këtyre të dhënave në përputhje afatet ligjore të zbatueshme, shkëmbimin dhe transmetimin e tyre midis organeve në fjalë dhe kontrolluesve të tjerë publikë e privatë etj”, thuhet në udhëzimin e Komisionerit, i cili sheh si të arsyeshëm edhe transferimin ndërkombëtar të këtyre të dhënave, me kushtin që të jenë në përputhje me Ligjin për Mbrojtjen e të Dhënave Personale.
Ndërsa lidhur me mësimin online, Komisioneri për Mbrojtjen e të Dhënave vlerëson se “është jashtëzakonisht e rëndësishme të shmanget përpunimi i të dhënave personale në tejkalim të sasisë dhe/ose cilësisë së nevojshme për të arritur qëllimin e sigurimit të vazhdimësisë arsimore”.
Duke e vënë theksin në mënyrë të veçantë te fëmijët dhe rreziku i ekspozimit të tyre online, Zyra e Komisionerit rekomandon fuqimisht marrjen e miratimit të prindit ose kujdestarit ligjor të fëmijës, në lidhje përpunimin e të dhënave në kontekstin e mësimdhënies online.
Në një udhëzim të mëparshëm, që mban datën 20 mars 2020, Zyra e Komisionerit njeh nevojën për përpunimin e të dhënave personale të subjekteve të të dhënave, të tilla si, por pa u kufizuar, emri, adresa, vendi i punës, detajet e udhëtimit, imazhet e regjistruara, etj.
"Më tej, përpunimi i të dhënave personale, të subjekteve përkatëse të të dhënave, mund të zgjasë vetëm për aq kohë sa ekziston qëllimi i përpunimit, me përjashtim të rasteve kur ka një parashikim ligjor specifik që përcakton përpunimin për një periudhë më të gjatë. Pra, për aq kohë sa paraqitet e nevojshme për zhdukjen e virusit COVID-19 dhe për rehabilitimin e pasojave të këtij virusi nga dhe për çdo subjekt të dhënash. Për rrjedhojë, me zhdukjen e pandemisë së shkaktuar nga COVID-19, çdo kontrollues (përshirë këtu institucionet ligjzbatuese) është i detyruar të fshijë/shkatërrojë të dhënat personale të përpunuara në këtë kuadër", thuhet në udhëzim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
