Polonia kërkon që një divizion ushtarak amerikan të vendoset në mënyrë të përhershme në territorin e saj si një “pengesë” për Rusinë dhe për këtë është e gatshme të paguajë 2 miliardë dollarë. Një propozim i Ministrisë polake të Mbrojtjes, me 17 faqe, e pasqyron këtë iniciativë.
Ky propozim mund të jetë potencialisht tundues për presidentin amerikan për një arsye të veçantë: natyra dypalëshe e marrëveshjes, pra një lidhje Varshavë-Uashington, që lë jashtë NATO-n dhe BE-në, ndaj të cilave Trump ka shfaqur rezerva.
Ky propozim tundues për Trump mund të shkaktojë shqetësim te NATO-ja dhe aleatët e BE-së. Në lidhje me Rusinë, ata kanë ndjekur një politikë të kujdesshme dhe të koordinuar për të vënë në dukje qëndrimin e Perëndimit ndaj lëvizjes së Moskës që aneksoi Krimenë në vitin 2014.
Në mënyrë të veçantë, mundësia e shkëputjes së marrëveshjeve ushtarake rrezikon të trondisë sistemin europian që e ka parë kuadrin ushtarak shumëpalësh si mjetin vendimtar të mbrojtjes që nga fundi i Luftës së Dytë Botërore. Po ashtu, një marrëveshje e mundshme do të pasqyronte rritjen e anëtarëve lindorë të Aleancës, që janë për një qëndrim më agresiv ndaj Rusisë.
Propozimi polak kundërshton bazën ligjore të Aktit Themeltar NATO-Rusi e vitit 1997, një marrëveshje që synon të lehtësojë tensionet dhe të forcojë bashkëpunimin mes rivalëve të Luftës së Ftohtë.
Propozimi polak konsiderohet një lëvizje e zgjuar, për mënyrën se si është hedhur. Në vend që të mbështeteshin te qëndrimi i Shtëpisë së Bardhë, zyrtarët polakë ua propozuan këtë ide anëtarëve me peshë të Kongresit amerikan, që kanë vizituar vendin javën e kaluar.
Kjo çështje shihet si problem për vendet aleate të NATO-s. Në vizitën e tij të hënën në Varshavë, sekretari i Përgjithshëm i NATO-së, Jens Stoltenberg, nuk e përmendi këtë temë në konferencën e përbashkët për shtyp me presidentin polak, Andrzej Duda.
Diplomatët e NATO-s thonë se as Polonia dhe as SHBA-të nuk e kanë hedhur ende një ide të tillë në zyrat e aleancës në Bruksel.
“Është e sigurt se kjo ide përshtatet me filozofinë e Trump-it. Pra, nëse do më shumë siguri, për këtë duhet të paguash”, citohet nga Politico.eu diplomati i një vendi me peshë në NATO.
Polonia ka pasur disa “përplasje” me Brukselin gjatë muajve të fundit për shkak të çështjeve që kanë të bëjnë me sundimin e ligjit në vend. / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
