Ndërsa zgjedhjet parlamentare të 11 majit 2025 po afrohen, partitë politike në Shqipëri kanë hyrë në një fazë të ngjeshur të fushatës elektorale. Megjithatë, sipas analistit Prenc Zogaj, fushata e dy partive të mëdha po zhvillohet nën të njëjtin ritëm të konsumuar, duke krijuar përshtypjen e një lloj “teatri të njohur”.
I ftuar në emisionin “Të Paekspozuarit” në MCN TV, Zogaj u shpreh se fushata po zhvillohet me të njëjtin narrativ, në thelb, "ta heqim qafe tjetrin", pa ofruar ide të reja apo vizion frymëzues.
Fushata e dy partive të mëdha është e ndërtuar mbi të njëjtin ton: ‘ta heqim qafe’. Është një skenë që e kemi parë disa herë, me të njëjtët protagonistë, të njëjtën ‘kolonë zanore’, të njëjtat grimasa dhe mënyra komunikimi. E njëjta lojë e vjetër, pa asnjë ndryshim domethënës.
Në aspektin politik dhe komunikues, fushata po duket e zbehtë dhe pa energji të re. Edhe sikur të kishim një mandat katërvjeçar pa fushatë, rezultati nuk do të ndryshonte shumë – për shkak të mungesës së alternativave reale dhe protagonizmit të lodhur.
Ky lloj kompromisi mes retorikës dhe mungesës së risisë, qoftë edhe me ndonjë gjenialitet, është kthyer në monoton.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
