Shumica e qytetarëve shqiptarë mendojnë se policia është e ndikuar politikisht në vendimmarrje. Kjo është një nga gjetjet e raportit të publikuar nga IDRA, një kompani hulumtimesh dhe konsulence zhvillimore me veprimtari në rajonin e Ballkanit dhe më gjerë. Raporti mbi perceptimin e publikut për punën e Policisë së Shtetit është prezantuar në Akademinë e Sigurisë. Sipas të dhënave, Shqipëria rezulton e fundit për besueshmërinë, në raport me vendet e BE.
Qytetarët shqiparë nuk kanë besueshmëri ndaj Policisë së Shtetit. Gjetjet e raportit të IDRA-s mbi perceptimin e publikut për Policinë e Shtetit, tregojnë se qytetarët nuk kanë besim te policia. 61% e tyre thonë se në shumicën e vendimarrjes, ajo është e ndikuar politikisht, dhe se një problematikë tjetër që hasin është edhe rryshfeti, ku publiku jep një vlerësim prej 50 pikësh, nga 100 në total.
Raporti i bërë publik nga IDRA, bën një krahasim të mesatares së besueshmërisë së qytetarëve ndaj policisë me vendet e Bashkimit Europian dhe rajonit, ku Shqipëria rezulton e fundit, me një mesatare prej 37 % . Ndërsa prezenca e OSBE-së gjatë tryezës së përbashkët vuri theksin gjetjen e bashkëpunimit polici-qytetar dhe gjetjen e shkaqeve dhe rrethanave se përse ky bashkëpunim nuk është në pritshmëritë e duhura.
Shifat tregojnë se besueshmëria e qytetarëve te policia ka rënë në krahasim me një vit e gjysmë më parë.
Në raportin e IDRA për vitin 2017, Policia e Shtetit renditej e para në listën e institucioneve më të besuara, me me 52 pikë nga 100 të mundshme. Raporti i publikuar në janar të 2017-s e vendoste policinë në krye të listës, duke e cilësuar si institucion më të besueshëm se presidenti, qeveria, Parlamenti, gjyqësori etj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
