Zjarri vazhdon të jetë aktiv në Vernik të Devollit, ndërkohë që situata e vështirë është pasuar nga vështirësitë e terrenit dhe kushteve atmosferike.
Korrespondentja e MCN nga Korça, Elsa Xhindole, raportoi për "MCN Live" se zjarri ka përfshirë këtë zonë për disa ditë dhe ndërhyrja është bërë e vështirë për shkak të terrenit të thyer.
Jemi në ditën e tretë të vatrave te zjarrit në qarkun e Korçës, konkretisht në fshatin Vernik dhe Dushnicë
Një ditë më parë, për shkak të përshkallëzimit të situatës, Shqipëria aktivizoi Mekanizmin Europian të Mbrojtjes Civile të BE-së për të marrë ndihmë ndërkombëtare për menaxhimin e zjarreve.
Aktualisht në zonë, situata e zjarrit është si më poshtë:
Në Vernik dhe Dushnicë, zjarri ka vazhduar për disa ditë. Megjithatë, vatrat e zjarrit në bashkinë Devoll, veçanërisht pranë fshatit Vernik, janë normalizuar dhe po punohet intensivisht për shuarjen e tyre. Prej orës 5:00, 75 forca nga MZSH dhe Shërbimi Pyjor janë angazhuar për neutralizimin e zjarrit, me shpresën se do të mund të kontrollohet, përveç nëse nuk ka riaktivizim nga era ose temperaturat e larta që priten edhe sot.
Në Dushnicë, situata mbetet e ndërlikuar. Po ashtu, prej orës 5:00, janë angazhuar 55 forca nga MZSH dhe Shërbimi Pyjor për të shuar zjarrin. Terreni i thepisur dhe distanca e madhe bëjnë që ndërhyrja të jetë më e vështirë, ndërsa zjarri përforcohet nga era, humusi dhe dendësia e bimësisë së shumellojshme që ndodhet në zonë.
Grupet e punës po vazhdojnë intensifikimin e operacioneve, ndërkohë që shpresa është që zjarri të mund të neutralizohet përfundimisht, pasi çdo riaktivizim mund të komplikojë më tej situatën.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
