Shkolla 9-vjeçare “Asllan Shahini” ditën e sotme është në ditë zie për 16-vjeçarin Fatjon Bici i cili ditën e djeshme humbi jetën tragjikisht nga një sherr me thika në lulishten e qytetit të Gramshit.
Shokët e tij të klasës nuk mund të mbanin lotët teksa kanë shkuar në shkollë mëngjesin e sotëm dhe në bankën e tij kanë vendosur lule.
Të rinjtë dyshohet se e kanë nisur konfliktin disa kohë më parë në rrjetet sociale dhe degradimi i situatës ka ardhur duke dashur të tregojnë se kush prej tyre ishte më i fortë.
Policia e Elbasanit njoftoi mëngjesin e sotëm arrestimin e katër adoleshentëve të akuzuar për vrasjen e Fatjon Bicit 16 vjeç dhe plagosjen e kushëririt të tij Marko Liçi 15 vjeç pranë shkollës 9-vjeçare “Asllan Shahini” në Gramsh.
Specialistët për Hetimin e Krimeve ndaj Personit, Pasurisë të miturve dhe Dhunës në Familje të DVP Elbasan, në vijim të hetimeve të kryera në drejtimin e Prokurorisë, kanë bërë arrestimin në flagrancë të shtetasve Xh. Ç., 15 vjeç, O. Ç, 14 vjeç, E. K., 15 vjeç dhe S. M., 16 vjeç.
Më datë 16.05.2023, rreth orës 13:30, këta shtetas, dyshohet se në bashkëpunim me njëri-tjetrin, pas një konflikti të çastit, në lagjen “Sporti 2”, Gramsh, në rrugë, kanë plagosur me mjete prerëse (thika), shtetasit e mitur Fatjon Bici, 16 vjeç dhe Marko Liçi, 15 vjeç.
Nga dëmtimet e marra, shtetasi Fatjon Bici ka humbur jetën, ndërsa shtetasi Mark Liçi vijon të jetë në kujdesin e mjekëve, jashtë rrezikut për jetën.
Në cilësinë e provës materiale u sekuestruan tre mjete prerës (thika), 2 përforcues grushti dhe 5 celularë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
