Irani tërhiqet nga dy prej pikave të marrëveshjes bërthamore të vitit 2015, një vit pasi prej saj u tërhoqën SHBA-të. Presidenti Hassan Rouhani tha se vendi do të shtojë rezervat e uraniumit, në vend që t'i shesë ato jashtë vendit.
Ai gjithashtu kërcënoi të rifillojë prodhimin e uraniumit brenda 60 ditësh.
Praktikisht, vendimi ka të bëjë me anulimin e dy prej pjesëve të marrëveshjes: shitja e uraniumit të pasuruar dhe ai që njihet si “uji i rëndë”.
Rouhani u dha vendeve që janë ende pjesë e marrëveshjes - Franca, Gjermania, Rusia, Kina dhe Britania e Madhe - 60 ditë kohë për të zgjedhur mes përmbushjes së detyrimeve financiare dhe ato që kanë të bëjnë me naftën.
Nëse këto nuk përmbushen, ai tha se Irani do të shtojë uraniumin e pasuruar, i cili aktualisht është i pezulluar dhe do të vërë në punë reaktorin e “ujit të rëndë”, bazuar në planet e bëra përpara marrëveshjes.
Për Rouhanin, kjo nuk është një dalje nga marrëveshja.
"Ne nuk duam të dalim nga JCPOA, ky është është një hap i ri brenda kornizës së kësaj marrëveshjeje", tha ai.
Marrëveshja e vitit 2015 ka pasur për qëllim reduktimin e ambicieve bërthamore të Iranit në këmbim të lehtësimit të sanksioneve, por tensionet Iran-SHBA janë rritur që nga tërheqja e Uashingtonit nga marrëveshja.
Ekonomia e Iranit është goditur nga sanksionet e rivendosura nga SHBA-të pas tërheqjes bnga marrëveshja.
Njoftimi nga ana e Iranit vjen pak orë pasi Sekretari Amerikan i Shtetit, Mike Pompeo, bëri një vizitë të paplanifikuar në Irak dhe një aeroplanmbajtës i SHBA u vendos në rajonin e Gjirit.
Zyrtarët amerikanë kanë raportuar për kërcënime të forcave amerikane dhe aleatëve të tyre nga Irani, por pak detaje kanë dhënë në lidhje me natyrën e këtyre kërcënimeve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
