21 persona mbetën të vrarë si pasojë e sulmit rus me raketa gjatë natës në rajonin jugor të Ukrainës në Odesa.
Shërbimi i emergjencës shtetërore, njoftoi se 16 persona u vranë në një ndërtesë nëntëkatëshe, ndërsa pesë të tjerë, përfshirë një fëmijë 12 vjeç, u vranë në një sulm të veçantë në një vendstrehimi.
Rusia ka lëshuar dhjetëra raketa në qytetet e Ukrainës në ditët e fundit, ndërsa ushtria ukrainase akuzon se rusët kanë përdorur bomba fosfori gjatë luftimeve në frontin e Detit të Zi.
Shpërthime të fuqishme janë ndjerë edhe në qytetin e Mykolaivit. Lajmin e bëri të ditur Kryebashkiaku i qytetit I cili përmes një mesazhi në telegram i lutej banorëve të qëndronin në vendstrehime për t’u mbrojtur.
Sirenat kundërajrore ranë në të gjithë rajonin ndërkohë që Mykolaiv ka mbi 400 mijë banorë dhe është qyteti i nëntë më i populluar në Ukrainë.
Por zëdhënësi i Kremlinit Dmitry Peskov mohoi përsëri se Rusia po godiste objektiva civile.
Nga ana tjetër Shtetet e Bashkuara të Amerikës kanë konfirmuar paketën e fundit të armëve për Ukrainën.
Pentagoni do t'i sigurojë Ukrainës dy sisteme raketash tokë-ajër NASAMS, katër radarë shtesë kundër-artilerie dhe deri në 150 mijë fishekë e municione artilerie.
Paketa e ndihmës, me vlerë rreth 820 milionë dollarë, u njoftua nga Presidenti i SHBA-ve, Joe Biden të enjten në Madrid pas samitit të liderëve të NATO-s që u përqendrua në pushtimin rus të Ukrainës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
