Mëngjesin e sotëm delegacioni i Komisionit të Venecias pati një takim me ish-deputetët e opozitës Klajda Gjosha dhe Oerd Bylykbashi.
Pas takimit ish deputeti Bylykbashi deklaroi për mediat se Kushtetuta e thotë mjaft qartë se kush e shkarkon Presidentin dhe se parlamenti kërkon që të fusë në këtë lojë të turpshme dhe institucionet ndërkombëtare.
Sipas Bylykbashit, presidenti Meta me dekretet e tij u përpoq të ruajë unitetin dhe pluralizmin në Shqipëri.
“Kushtetuta është e qartë, Presidenti i Republikës shkarkohet vetëm nga Gjykata Kushtetuese nëse ka shkelur Kushtetutën. Presidenti është përpjekur të garantojë unitetin e popullit dhe pluralizmin në Shqipëri. Kjo është një nga detyrat fisnike që duhet të luajë dhe ka luajtur presidenti. Parlamenti po përpiqet që të shkarkojë presidentin dhe në këtë lojë të turpshme përpiqet të bëjë palë institucionet ndërkombëtare që janë të qarta në lidhje me këtë”, u shpreh Bylykbashi.
Ndërsa ish ministrja Gjosha deklaroi se diskutimet për shkarkimin e presidentit janë të paprecedenta. Sipas saj qeveria merret me këtë çështje për të mbuluar keqqeverisjen dhe raportin e OSBE/ODIHR.
“Diskutuam një çështje që është e paprecedentë, aq më tepër për një vend që dëshiron të jetë pjesë e BE. Qeveria do duhej të fokusohej në plotësimin e kushteve për marrjen e rekomandimit për çeljen e negociatave, ne merremi me një çështje të rëndë, që është për të mbuluar gjithçka që sot shkon keq me qeverisjen, për të mbuluar raportin e OSBE/ ODIHR, që tregon qartë se në Shqipëri zgjedhjet janë pa standarde. Parlamenti dhe mazhoranca kërkojnë të bëjnë politikë me çdo gjë”, u shpreh Klajda Gjosha.
Anëtarët e Komisionit do t’i vijojnë takimet në Kryesinë e Kuvendit. Ata do të takohen me kreun e Grupit Parlamentar të PS, Taulant Balla, anëtarët e opozitës se re dhe kryeparlamentarin Gramoz Ruçi.
Komisioni i Venecias në Tiranë/ Takimi i mëngjesit me PD-LSI
Sot dhe nesër, Komisioni i Venecias do të vijë në Tiranë, në një vizitë faktmbledhëse dhe konsultative, mbi arsyet pse kërkohet shkarkimi i presidentit Ilir Meta.
Komisioni publikoi axhendën e takimeve që ekspertët e delegacionit do të zhvillojnë në kuadër të përgatitjes së opinionit mbi kompetencat që Presidenti ka në proceset zgjedhore.
Ekspertët europianë kanë parashikuar të takohen në Kuvend me përfaqësues të mazhorancës dhe opozitës parlamentare.
Gjithashtu takime do të kenë me Presidentin, Kryeministrin, Ministrin e Brendshëm dhe përfaqësues të KQZ-së.
Ekspertët ligjorë europianë në axhendën e takimeve kanë parashikuar edhe një takim me përfaqësues të PD-së dhe LSI-së që tashmë janë jashtë Parlamentit.
Takimi është planifikuar më 10 shtator, në ora 08: 00 me dy përfaqësuesit e opozitës Oerd Bylykbashi dhe Klajda Gjosha.
Pas vizitës në Tiranë, ekspertët e Komisionit të Venecias pritet të hartojnë një opinion paraprak, ndërsa opinioni përfundimtar do të miratohet më 12 tetor.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
