Komisioni i Pavarur i Kualifikimit ka shkarkuar ditën e sotme gjyqtaren e Apelit Shpresa Beçaj, e cila nuk ishte e pranishme në seancë.
Në datën 1 korrik u mbajt seanca dëgjimore, ku KPK deklaroi se Beçaj nuk ka dorëzuar deklaratën e pasurisë pranë ILDKPI-së si dhe as deklaratën e pastërtisë së figurës dhe as të vlerësimit profesional, duke mos përmbushur kështu detyrimin ligjor për të dalë para Vettingut.
Kurse Avokati mbrojtës i Gjyqtares Jualian Mërtiri e ka cilësuar relacionin e KPK jo të saktë, meqë Beçaj nuk ka qenë e detyruar të dorëzojë deklaratat, pasi në kohën që ato duheshin plotësuar, ajo ushtronte profesionin e avokates dhe jo gjyqtares.
Por trupa gjykuese e përbërë nga Suela Zhegu, Roland Ilia dhe Lulzim Hamitaj vendosi ta lërë Beçajn jashtë sistemit të drejtësisë.
Shpresa Beçaj ka përfunduar studimet në drejtësi në vitin 1983 dhe e ka filluar karrierën si gjyqtare nga Gjykata e Gramshit. Ajo u emërua gjyqtare në Tiranë në vitin 1990 ndërsa në vitin 1994 u promovua si gjyqtare e Apelit të Tiranës.
Në vitin 2004, Beçaj u dekretua gjyqtare në Gjykatën e Lartë ndërsa 4 vjet më pas u emërua kryetare e kësaj gjykate. Me përfundimin e mandatit në vitin 2013, Beçaj udhëhoqi një betejë ligjore kundër Këshillit të Lartë të Drejtësi për t’u rikthyer në Gjykatën e Apelit të Tiranës dhe e fitoi atë. Megjithatë, vendimi për emërimin e saj në Gjykatën e Apelit u shty deri në vitin 2018.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
