Eksperti i sigurisë Ilir Kulla tha në emisionin “Zonë e Lirë” se kryeministri Rama gjendet për herë të parë para një akuze të shkruar nga SPAK-u dhe të miratuar nga gjykata. Bëhet fjalë për emërimin e bashkëshortes së një biznesmeni si zv.ministre, gjatë kohës që Veliaj drejtonte ministrinë e Punës dhe çështjeve Sociale. Sipas Kullës akuza në letra është për Veliajn, por de facto është edhe për Ramën. Sipas ekspertit të sigurisë kjo kalon limitet e normalitetit juridik dhe demokratik.
"Kryeministri gjendet për herë të parë para një akuze të shkruar nga Prokuroria dhe të miratuar nga gjykata. Gjyqtari ka dhënë autorizimin për kryetarin e bashkisë dhe bashkëshorten, që konflikti i interesit është që bashkëshorten e njërit prej biznesmenëve e ka bërë zv.ministre të Punës dhe çështjeve Sociale.
Çështja është që zv.ministret i emëron kryeministri. Një gjykatë në vend i thotë kryetarit të Këshillit të Ministrave që ke bërë një emërim në përplasje me interesa, ndërkohë që kjo është e drejtë ekskluzive kushtetuese e tij. Në këto raste Këshilli i Ministrave duhet të shkojë në Gjykatë Kushtetuese.
Kjo akuzë për korrupsion i bëhet gjithë qeverisë. Kjo kalon limitet e normalitetit juridik dhe demokratik. Kjo akuzë po i bëhet me letra Veliajt, por de facto është për kryetarin e Këshillit të Ministrave. Rama po u flet atyre që flasin anglisht. Në këtë rast kemi të bëjmë me një poshtërim tipik”.
Kulla u shpreh që kemi ardhur në pikën ku pushteti politik është në luftë të hapur me pushtetin juridik.
Kulla tha se “jemi në nivelet e absurdit dhe rrezikojmë edhe kaosin politik”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
