Presidenti i Kosovës, Hashim Thaçi ka përsëritur qëndrimin e tij kërkesa e komunave Preshevë, Bujanoc e Medvegjë, për t’iu bashkuar Kosovës, të shqyrtohet për zbatim në kuadër të procesit të demarkacionit që do të zhvillohet me Serbinë.
“Vullneti i shprehur i qytetarëve të Preshevës, Bujanocit dhe Medvegjës më 1 dhe 2 mars 1992, për bashkëngjitje me Kosovën është institucionalizuar tek organet shtetërore të Republikës së Kosovës”, thekson Thaçi.
“Kjo kërkesë e tyre është ndërkombëtarizuar në pikën më kulminante botërore. Kjo çështje do të diskutohet në kuadër të demarkimit të kufirit prej 430 kilometrave ndërmjet Kosovës e Serbisë dhe mund të zgjidhet”, shkruan Thaçi në postimin e tij në rrjetin social "Facebook".
Kreu i shtetit të Kosovës ka adresuar një mesazh edhe për pjesën tjetër të spektrit politik në Kosovë.
“Të mos mbesim rob të dhuratave të antishqiptarit famëkeq Aleksandër Rankoviç, por të punojmë për korrigjimin e historisë dhe rritjen e sigurisë për të ardhmen evropiane. Rezultate të marrëveshjes eventuale paqësore ndërmjet Kosovës dhe Serbisë do të jenë njohja reciproke me Serbinë, njohja nga pesë vendet e Bashkimit Evropian, anëtarësimi në Këshillin e Evropës, anëtarësimi në OSBE dhe heqja e vetos ruse në Këshillin e Sigurimit, si parakusht për anëtarësimin e Kosovës edhe në OKB”, ka shkruar Thaçi.
Kjo marrëveshje, sipas tij, sjellë më tepër paqe dhe stabilitet në rajon, si dhe Kosovës i hapë rrugë të sigurt dhe të shpejtë për në NATO dhe Bashkim Evropian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
