Avokati Romeo Kara ka komentuar protestat kundër projektit në Zvërnec, duke e konsideruar reagimin qytetar si pasojë të një grumbullimi të gjatë pakënaqësish ndaj mënyrës së qeverisjes, mungesës së transparencës dhe trajtimit të pronës.
Në ‘MCN Live’, Kara përdori një gjuhë të gjatë dhe të drejtpërdrejtë për të përshkruar atë që ai e quan degradim të raportit mes qytetarëve dhe institucioneve.
Arroganca ka zënë goxha vend dhe është e kotë të flasim sikur gjërat janë normale, sepse ata që janë në pushtet e dinë mirë se çfarë ndodh, ndërsa ne poshtë shohim vetëm një realitet tjetër. Janë shkëputur lidhjet me realitetin dhe transparenca është rrëzuar krejtësisht.
Sipas tij, problemi nuk lidhet vetëm me një projekt konkret, por me një qasje më të gjerë institucionale dhe politike që ka, siç tha ai, krijuar një hendek të thellë mes vendimmarrjes dhe qytetarëve.
E kemi parë në mënyrë arrogante se si institucione si AKSHI, Kadastra dhe struktura të tjera nuk lejojnë Kontrollin e Lartë të Shtetit të hyjë, nuk japin informacion, dhe kjo konfirmon atë që thonë edhe drejtues të mediave. Kur bie transparenca, arroganca merr vend dhe bëhet e pamundur të flasësh për normalitet.
Duke folur për gjendjen në terren dhe protestën, ai shtoi se reagimi qytetar është i pashmangshëm pas një periudhe të gjatë pakënaqësish.
Unë jam një qytetar që më kanë marrë jetën dhe jetën e fëmijëve të mi, dhe prandaj do jem atje në atë protestë. Nuk është më çështje e një vendimi të vetëm, por e një mënyre të tërë të të bërit shtet, ku ligjet ndryshohen sipas hallit dhe jo sipas parimit.
Kara solli në vëmendje edhe çështjen e pronës dhe reformave ligjore, duke i cilësuar ato të pasakta dhe shpesh të padrejta në zbatim.
Ligji 7501 dhe reformat agrare janë bërë keq, janë prekur interesa dhe janë krijuar padrejtësi të mëdha. Nuk mund të ndryshosh ligjet vazhdimisht sipas situatës dhe interesit të momentit, sepse kështu shkatërrohet besimi.
Në përfundim, ai e cilësoi protestën në Zvërnec si një moment simbolik të një pakënaqësie të akumuluar.
Zvërneci ishte pika që derdhi kupën e mbushur. Aty u pa qartë se qytetarët nuk kanë më durim për arrogancën dhe shkëputjen nga realiteti. Ata protestues më japin një gjendje pozitive që nuk e kam ndjerë prej kohësh.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
