Presidenti i Kosovës, Hashim Thaçi të martën ka folur për mediat pas takimit që pati me këshilltarët e kancelares gjermane, Angela Merkel dhe presidentit francez, Emanuel Macron.
Thaçi deklaroi se me të dërguarit e Merkel dhe Macron kanë biseduar për situatën politike në Kosovë, ndërsa theksoi se ishte zhgënjyese, pasi tema e liberalizmit të vizave as nuk u diskutua nga ata.
Ai u shpreh para gazetarëve se me të dërguarit e kancelares Merkel dhe presidentit francez Macron, u diskutua rreth zhvillimeve të fundit në Kosovë, Ballkanin Perëndimor, fokusit europian për të ardhmen, aktualitetin, por edhe mbi prespektivën.
Thaçi nënvizoi se ishte zhgënjyes fakti se as sot nuk u dëgjua asgjë për liberalizmin e vizave për Kosovën, madje sipas tij, nëse do të hapej si temë, as nuk do të diskutohej.
Ai tha se kjo ishte diçka zhgënjyese për qytetarët e Kosovës, në një kohë kur para pesë vitesh BE ka qenë e gatshme të marrë vendimin për liberalizim të vizave.
Presidenti u shpreh se mos uniteti i BE-së, është i padrejtë në rrafshin e aktualitetit, por edhe një gabim strategjik që po bën BE në raport me Kosovën.
Sipas tij, Bashkimi Europian duhet të nxjerrë vendimin për liberalizimin e vizave me Kosovën, më pas të mendojë nëse ka lidership për të shtyrë përpara dialogun për normalizimin e marrëdhënieve Kosovë-Serbi.
“Nga ajo që unë kuptoj e shoh se BE është plotësisht e papërgatitur për fazën e dytë, ndërsa për të parën ka menduar në mënyrë elegante për të anashkaluar liberalizimin e vizave, duke e kthyer në një proces të pasigurt, të panjohur, të pafuqishëm për të arritur ndonjë marrëveshje'', tha Thaci.
Delegacioni franko-gjerman përbëhet nga këshilltarët kryesorë të kancelares gjermane Angela Merkel dhe presidentit francez Emanuel Makron, Jan Hecker dhe Emmanuel Bonne.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
