Afrikë e Jugut, gjykata ndalon ish-presidentin Zuma të kandidojë në zgjedhje

Gjykata më e lartë e Afrikës së Jugut ka ndaluar ish-presidentin Jacob Zuma të kandidojë në zgjedhjet e përgjithshme të javës së ardhshme.

Gjykata Kushtetuese vendosi se dënimi i tij me 15 muaj burg për mospërfillje të gjykatës e skualifikon nga kandidimi.

Zuma u dënua në vitin 2021 për shkak të refuzimit për të dëshmuar në një çështje e cila hetonte korrupsionin gjatë presidencës së tij, e cila përfundoi në vitin 2018.

Ai ka bërë fushatë nën flamurin e partisë së sapoformuar uMkhonto weSizwe (MK- Shtiza e kombit) pasi u përplas me Kongresin Kombëtar Afrikan në pushtet (ANC).

Sekretari i përgjithshëm i partisë së Zumës, Sihle Ngubane tha se partia ishte e zhgënjyer me vendimin, por se kjo nuk do të ndikonte në fushatën e partisë dhe fytyra e ish-presidentit do të mbetej në fletën e votimit për zgjedhjet e 29 majit.

Ai është ende kreu i partisë. Gjykimi nuk ndikon aspak në fushatën tonë.

Afrikanët e Jugut votojnë për partitë politike, ku kandidatët në krye të listave marrin vende parlamentare në varësi të numrit të votave që merr partia.

Mbështetësit e tij u revoltuan pasi ai u dërgua në burg në vitin 2021 dhe disa nga drejtuesit e saj kishin kërcënuar me dhunë nëse gjykata e skualifikonte atë nga kandidimi për parlament.

Kushtetuta e Afrikës së Jugut ndalonte çdo të dënuar me 12 muaj burg, pa opsionin e gjobës, të shërbente në parlament për të mbrojtur integritetin e “regjimit demokratik” të vendosur pas përfundimit të sistemit racist të aparteidit në 1994.