Nga Belemi në Brazil, qyteti mikpritës i bisedimeve të OKB-së për klimën në vitin 2025, presidenti brazilian Lula dhe ai francez Macron promovuan një plan ambicioz prej 1 miliardë eurosh për të shpëtuar pyjet e Amazonës. Ky pyll tropikal, më i madh në botë, luan një rol kyç në luftën kundër ndryshimeve klimatike duke thithur emetimet e dioksidit të karbonit.
Palët kanë dakordësuar gjithashtu krijimin e një "tregu karboni", që synon të shpërblejë vendet që investojnë për shtimin e pyjeve. Një pikë tjetër është mbështetja për njerëzit indigjenë dhe komunitetet lokale të Amazonës.
“Si shenjë mirënjohjeje, shteti francez i jep prijësit indigjen Raoni Metuktire dekoratën e Legjionit të Nderit, për rolin e tij për ruajtjen e pyjeve tropikale dhe kulturën e popujve indigjenë.”, tha Macron.
Metuktire është një ndër personazhet më të njohur që ndërgjegjëson nëpër të gjitha samitet ndërkombëtare për kërcënimet që vijnë nga shkatërrimi i pyjeve tropikale.
Sa i përket diskutimeve politike dhe ekonomike mes palëve, Franca dhe Brazili po punojnë për të prodhuar katër nëndetëse me fuqi konvencionale. Në tavolinë është marrëveshja e tregtisë së lirë midis Bashkimit Evropian dhe Amerikës së Jugut, që ka hasur rezistencë të ashpër nga fermerët evropianë kohët e fundit. Po ashtu, lufta në Ukrainë është një temë e ndjeshme mes dy liderëve, pasi Lula refuzon të mbajë qëndrim kundër Rusisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
