Aborti spontan në disa raste mund të ndodhë për shkak të meshkujve. Mund të duket e çuditshme, por ky është përfundimi i një studimi të mirëfilltë shkencor. Imperial Collge of London ka kryer një hulumtim shkencor, i cili arriti në konkluzionin se partnerët e grave që kanë pasur disa aborte spontane paraqesin dëmtime të ADN-së.
Abort spontan konsiderohet çdo abort që ndodh pa arsye të jashtme brenda 180 ditëve të para të shtatzënisë. Pjesa më e madhe e aborteve spontane ndodhin gjatë tremujorit të parë. Rreth gjysma e këtyre aborteve mendohet se kanë shkak pikërisht ADN-në e baballarëve. Ndërkohë, gjysma tjetër ndodh për shkaqe si: anomalitë strukturale në aparatin riprodhues të femrës, problemet hormonale dhe sëmundjet autoimune.
ADN-ja e spermatozoideve
Studiuesit në Londër kanë hulumtuar cilësinë e spermës mashkullore në lidhje me abortin spontan. Për ta bërë këtë ata përfshinë në studim 50 burra, partneret e të cilëve kishin pasur të paktën 3 aborte spontane para 20 javëve të para të shtatzënisë.
Duke analizuar ADN-në e spermës, shkencëtarët zbuluan se materiali gjenetik ishte të paktën dy herë më i dëmtuar në krahasim me atë të spermës nga burrat, partneret e të cilëve nuk kishin pasur kurrë aborte spontane. Studimi gjithashtu tregoi se në këta individë, nivelet e radikaleve të lira të oksigjenit - veçanërisht molekulat reaktive që dëmtojnë ADN-në - ishin katër herë më të larta se normalja, një fakt shumë i rëndësishëm që lidhet drejtpërdrejt edhe me mbipeshën. Obeziteti gjithashtu prej kohësh njihet si shkak i mundshëm i infertilitetit, si pasojë e një prodhimi të shtuar të radikaleve të lira.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
