Tërmeti nuk është diçka për të qeshur, por e tillë është shuma e ofruar në rast dëmtimi të shtëpisë, e reklamuar këto ditë nga një bankë dhe një shoqëri sigurimesh në Tiranë. Një bankë e nivelit të dytë ofron për klientët e saj mbulim për dëmtime nga tërmetet – mundësuar nga shoqëria X në bashkëpunim me një fondacion dhe një program të qeverisë zvicerane. Polica e sigurimit do t’i jepet falas 300 klientëve të parë që financohen me kredi pranë Bankës së nivelit të dytë.
Kjo policë i mundëson të siguruarve individë një pagesë të menjëhershme fikse prej 300,000 lekë në rast të dëmtimit të plotë të banesës nga tërmeti. Për vitin e parë primi i kësaj police do të mbulohet 100% nga Banka. Duke filluar nga data 5 Shtator 2017, 300 klientë të Bankës mund të kenë sigurimin e tyre nga tërmetet falas për një vit. Pas vitit të parë klientët mund të zgjedhin nëse duan të vazhdojnë mbulimin e drejtpërdrejtë me kompaninë e sigurimeve X.
Shërbimi mundësohet nga Programi i Sigurimit të Rrezikut nga Katastrofat Natyrore në Europën Juglindore, financuar nga Sekretariati Zviceran i Shtetit për Çështjet Ekonomike (SECO) dhe nga Banka Botërore. Ky program synon ndërgjegjësimin e popullatës për sigurimin e pronës ndaj tërmeteve. Për shkak të pozicionit gjeografik Shqipëria është e rrezikuar nga tërmetet si pasojë e aktivitetit të lartë sizmik. Studimet më të fundit e vendosin Shqipërinë ndër vendet më të rrezikuara të rajonit së bashku me Greqinë dhe Turqinë.
Megjithatë vetëm një pjesë e vogël e popullsisë kryen këtë lloj sigurimi. Autoritetet dhe institucionet ndërkombëtare po bëjnë thirrje që popullatat në vende si i yni të sigurojnë pronat nga tërmetet pasi përndryshe pasojat ekonomike dhe sociale do të ishin të rënda.
Në fakt një sigurim i tillë nuk i përgjigjet aspak vlerës së çmimeve të banesave në Shqipëri, ku me 300 mijë lekë nuk mund të blesh më tepër se 3 metër katror pronë të paluajtshme. Në vend të sensibilizimit, këto lloj fushatash iu heqin dëshirën njerëzve të sigurohen në rast katastrofash.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
