Vdes në aksident kryekomunari dhe kryetari i këshillit komunal në Serbi

Kryetari i komunës dhe kryetari i këshillit komunal të komunës së Ranillugut në Serbi gjetën vdekjen në një aksident automobilistik.

Mediat serbe bëjnë me dije se automjeti u aksidentua në autostradën për në qytetin e Nishit, duke lënë të vdekur dy politikanët lokalë.

Përveç dy viktimave, përkatësisht kryekomunari Gradimir Mikic dhe Sasha Aleksic, mbetën të plagosur edhe dy persona të tjerë.

Aksidenti u regjistrua pranë devijimit të Doljevac në autostradën Nish-Leskovac.

Mjeti, siç shkruajnë mediat serbe, doli nga rruga dhe u përmbys. Shkaqet e aksidentit tani për tani janë të panjohura.

Dy të plagosurit rëndë janë një burrë dhe një grua, të cilët janë transportuar për në Qendrën Klinike të Nishit.