Gjykata e Tiranës ka lënë në burg Daniel Drobajn, 18-vjeçarin që akuzohet për plagosjen e rëndë të efektives së policisë Ina Nuka, në protestën e së enjtes para Parlamentit.
Gjatë kësaj proteste që banorët e Astirit kundërshtonin vendimin e qeverisë për shembjen e banesave të tyre, duke kërkuar dëmshpërblim 100%, humbi dy gishta për shkak të shpërthimit të një kapsolle efektivja e “Shqiponjave”.
Drobaj u arrestua nga policia mbrëmjen e të premtes, rreth 24 orë pas shpalljes në kërkim.
Në seancë, i riu erdhi me dorë të fashuar duke thënë se policët në komisariat e kanë goditur me shkelma, duke bërë që ai të mos lëvizë dot tre prej gishtërinjve të tij. Ndërkohë, 18-vjeçari ka pranuar se ka pasur tre kapsolla, por se ai i ka hedhur në drejtim të llamarinave që rrethojnë ndërtimin e Xhamisë së Namazgjasë, e cila ndodhet pranë Parlamentit shqiptar, atje ku u zhvillua protesta e banorëve të Astirit javën e kaluar.
Ndërkohë, avokati i 18-vjeçarit është shprehur se prokuroria në fakt nuk ka asnjë lloj prove që të mund të vërtetojë faktin se ka qenë Danieli personi që ka shkaktuar plagosjen e rëndë të polices 24-vjeçare Nuka.
"Ai nuk ka kryer asnjë vepër penale, për shkak se plagosja e rëndë me dashje që prokuroria pretendon se e ka kryer, nuk kemi asnjë rrethanë konkrete që ligji parashikon. Nëse ai e ka hedhur një kapsollë në drejtim të grumbullit të policisë, nuk ka pasur qëllim për të dëmtuar ndonjë polic. Nuk kemi konfimin për nivelin e dëmtimit të të dëmtuarës, pasi Instituti i Mjekësisë nuk ka dalë me një rezultat për nivelin e dënimit.
Përsa i përket kundërshtimit të policisë, ai ka dalë në mbrojtje të banesës, nuk ka ushtruar dhunë. Protesta është në natyrën e saj, qëndresa e qytetarëve, dhe nuk ka pranuar për ta shoqëruar në polici.
Sipas tij, është ushtruar dhunë me sharje dhe goditje me grushte. Prokuroria nuk ka asnjë provë se plagosjen e ka kryer Drobaj, por pretendon se ka një kohë televizive dhe në mënyrë të përafërt pretendojnë se mund të jetë ky person. Ka pranuar se ka hedhur tre kapsolla", tha avokati.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
