Ndoc Ndoci, banori i pallatit në Shkodër që është “molla e sherrit” mes familjes Shkambi dhe 31 familjeve të strehuara aty, foli në edicionin e lajmeve në MCN TV një ditë pas vrasjes së gjyqtarit Astrit Kalaja.
Ndoci thotë se nëna e të gjitha të këqijave është ish-kryebashkiaku Lorenc Luka.
Ndoci vë në dukje se Luka në 2009 u ktheu përgjigje banorëve që objekti s’plotëson kushtet për shitje, dhe mandej e nxori në shitje në 2012-ën. Ndoci thotë se të gjithë banorët e pallatit janë të shqetësuar dhe të stresuar.
“Unë s’kam qenë në gjykatë. Ne jemi të vendosur në godinë me dokumente të bashkisë, akt-marrëveshje nga 92-93’. Në 2012 kanë filluar lëvizjet për të na nxjerrë nga shtëpia dhe nga 2012 e sot jemi nëpër gjykata. Në 92’ jemi vendosur këtu nga bashkia me akt-marrëveshje. Problemet kanë nisur në 2012, kanë vazhduar, derisa erdhi dita e djeshme. Ka shumë padi. Ne kemi bërë gjyqe. Ne jemi vendosur në 92-93’ dhe kemi kërkuar ta privatizojmë. Nëna e të këqijave është Lorenc Luka, sepse na ka kthyer përgjigje në 2009 që s’plotëson kushtet për shitje dhe ia ka shitur atij në 2012-ën. Janë me qindra gjyqe.
Jemi shumë të shqetësuar sa nuk dimë se nga shkojmë. Jemi të stresuar, i madh dhe i vogël, nuk dimë nga shkojmë. Është problem i zgjidhur nëse duan ta zgjidhin. Ku e ka burimin e pronës ky, drejtësia dhe Lorenc Luka me të?! Përveç gazetarëve s’kemi patur asnjë komunikim. Falënderoj një oficerë policie që më tha ruaj gjakftohtësinë, rri i qetë. Unë do vazhdoj ta ndjek këtë çështje në sallat e gjyqit. E kam ndërtuar shtëpinë me forcat e mia, se s’ka pas as derë, as mobilje. Jam i vetmi njeri që pranoj të prononcohem në mediat, se e kam vendos me vdek në këtë shtëpi. Kur kemi kërkuar strehim na kanë thënë mos bëni zë, s’ju ka nxjerrë kush nga shtëpia, mos kërkoni komoditet”.
I pyetur nëse shteti do t’u jepte shtëpi tjetër, a do të ishit të gatshëm ta lini atje, Ndoci u shpreh:
“Po tani, që të mbyll sherrin jam i gatshëm të bëj çfarë të duash, për të mirë të së mirës duhet të pranojmë edhe sakrifica. Zgjidhja ka qenë. Problemi është te Lorenc Luka. Si e blen shtëpinë me 30 familje brenda?!”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
