SHAV: Aktet e dhunshme në Vaun e Dejës, turp kombëtar

Shoqata për Autonominë Vendore në një deklaratë për shtyp ka dënuar dhunën në Vaun e Dejës, duke e cilësuar si një turp kombëtar dhe duke shpreheur bindjen se banorët nuk kanë lidhje me aktin makabër.

SHAV-i u bëri thirrje bashkive të mos tradhtojnë misionin e tyre ndaj njerëzve dhe ligjit dhe qytetarëve të respektojnë ligjin dhe të bashkëpunojnë për zgjedhje të lira e të papenguara.

Deklarata:

“DEKLARATË PËR SHTYP në emër të 46 kryetarëve të bashkive, dënon në mënyrën më të ashpër veprimet e dhunshme të ushtruara nga nëpunës të Bashkisë së Vaut të Dejës, dhe familjarë të tij. Djegia e shkollës “Ndre Mjeda” në Vaun e Dejës, turp kombëtar! Dënojmë me forcë sjelljen e Kryetarit Zef Hila, e padenjë dhe e paligjshme, s'mund të përfaqësojë qytetarët. Cenimi i fizik i forcave të policisë, prindër, bij e vëllezër shqiptar është një akt barbar, e kriminal i papranueshëm nga kushdo. Ky akt është dhe më i dënueshëm kur ushtrohet nga nënpunës publik të paguar nga taksapaguesit e këtij vendi për të shërbyer dhe jo për të vandalizuar qytetin e tyre. Ne jemi të bindur që banorët e Vaut të Dejës nuk kanë lidhje me këtë akt makabër dhe sot secili prej tyre distancohet nga ky akt njësoj si ne. I bëjmë thirrje bashkive, të mos tradhtojnë misionin ndaj njerëzve e ligjit. Shprehim solidaritet me banorët e Vaut të Dejës që s'kanë lidhje me dhunën dhe angazhohemi që të ndihmojmë me ringritjen e shkollës. Ne i bëjmë thirrje gjithë të zgjedhurve lokalë të të gjitha forcave që në frymën e Kushtetutës, por dhe të gjithë deklaratave të partnerëve tanë të SHBA dhe të BE-së të bashkëpunojnë për të patur zgjedhje të lira dhe të papenguara më datë 30 Qershor. Shprehim mbështetjen tonë të plotë për Policinë e Shtetit dhe ftojmë qytetarët të votojnë lirshëm të dielën, të ushtrojnë të lirë të drejtën e tyre për të zgjedhur si aktin më të rëndësishëm të ushtrimit të detyrave tona qytetare. Tiranë, 28 Qershor 2018 Shoqata për Autonominë Vendore.”