"Besimi i biznesit tek ekonomia ka rënë. Shkak është bërë ndikimi i pandemisë së Covid-19 dhe progresi më i ulët se sa pritej në treguesit kryesorë". Është ky përfundimi i edicionit të 9 të Indeksit të Besimit, publikuar nga Dhoma Amerikane e Tregtisë, një raport që mat perceptimin e klimës së sipërmarrjes.
Besimi i biznesit në Shqipëri ra me 0.5% në 2021, duke arritur në 37.6, krahasuar me vitin e mëparshëm kur ky tregues ishte 38.1. Rënia e besimit të përgjithshëm të biznesit ishte relativisht e vogël, por e rëndësishme, pasi shënoi nivelin më të ulët të besimit nga bizneset, që nga fillimi i Indeksit në 2012.
Për më tepër, perceptimi i përgjithshëm i biznesit nuk ishte në gjendje të rikuperonte nga rënia e thellë prej 5% një vit më parë. Kontributi në një rënie të mëtejshme duket se lidhet me ndikimin e pandemisë në ekonominë shqiptare. Nevoja për një ndryshim më të fortë të politikave për reformat në mjedisin e investimeve është reflektuar gjerësisht në sondazh.
Më shumë se 71% e anëtarëve të Dhomës Amerikane perceptuan klimën e biznesit në Shqipëri si të pafavorshme. Ata vlerësojnë problem rritjen e burokracive; perceptimin e korrupsionit; monopoleve dhe konkurrencës së pandershme; ndikimin në rritje të klimës politike dhe çështjet me pronat.
E përmirësuar paraqitet situata me infrastrukturën dhe furnizimin me energji elektrike.
Presidenti i Dhomës Amerikane të Tregtisë, Eni Jaço, bënë të ditur se Rezultatet e Indeksit të Biznesit për vitin 2021 janë matës real që tregojnë se Shqipëria, ka ende sfida të mëdha për të kapërcyer me klimën e biznesit.
Sipas tij dinamika e zhvillimeve por edhe perspektivës Europiane që Shqipëria synon, nuk lë më kohë për reflektim, por nxit rëndësinë e një aksioni të përbashkët.
Raportin e ka komentuar edhe ambasadorja e SHBA, Yuri Kim, e cila shprehet se ekziston një lidhje e drejtpërdrejtë midis sundimit të ligjit dhe biznesit. Sipas saj, rregullat e qarta dhe gjykatat e pastra do të tërheqin më shumë investime amerikane e do i japin më shumë shqiptarëve prosperitet.
Ekziston një lidhje e drejtpërdrejtë midis sundimit të ligjit dhe biznesit. Rregullat e qarta (përfshirë zgjidhjen përfundimtare të të drejtave të pronësisë), gjykatat e pastra dhe ndjekja e vazhdueshme e korrupsionit do të tërheqin më shumë investime amerikane dhe do t’i japin më shumë shqiptarëve një shtyrje të drejtë drejt prosperitetit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
