Krime, shpërthimi shkatërron raketat ruse të destinuara për flotën e Detit të Zi

Raketat ruse “Kalibr” të transportuara me tren në flotën ruse në Detin e Zi u shkatërruan në një shpërthim në qytetin Dzhankoi të Krimesë.

Njoftimi u bë nga Ministria e Mbrojtjes e Ukrainës. Autoritetet në Kiev, cituar nga CNN, nuk e kanë marrë drejtpërdrejt përgjegjësinë për sulmin, duke deklaruar gjithsesi se ai shërben për “çmilitarizimin e mëtejshëm të Rusisë dhe përgatitjen e gadishullit të Krimesë për çlirimin nga okupimi”.

Sergei Askyonov, kreu i autoriteteve lokale pro-ruse, konfirmoi sulmin dhe aktivizimin e sistemit të mbrojtjes ajrore të rajonit njoftoi rrëzimin e dy dronëve ukrainas në Dzhankoi.

Si pasojë e shpërthimit një person është lënduar dhe dy ndërtesa janë dëmtuar.

Dzhankoi është një nyje kyçe rrugore dhe hekurudhore që luan një rol të rëndësishëm në furnizimin e operacioneve të Rusisë në Ukrainën jugore.

Krimea ka gjithashtu një port të rëndësishëm dhe një bazë të madhe detare për flotën ruse të Detit të Zi në qytetin e Sevastopolit. Disa nga luftanijet më të rëndësishme të Rusisë janë ankoruar atje, duke përfshirë anije sipërfaqësore të pajisura me raketa lundrimi.

SHBA e ka akuzuar më herët Rusinë për përdorimin e raketave lundruese të lëshuara nga anijet në Detin e Zi për të goditur objektivat civilë në Ukrainë.