Tensionet në veri të Kosovës, Deliu: Nëse do kishte trupa amerikane në KFOR nuk do të kishte vetëm të plagosur, por edhe të vrarë

Ish- anëtari i Forcave Speciale të Ushtrisë dhe njëherazi deputet i Kuvendit të Shqipërisë, Denis Deliu deklaroi në studion e emisionit “FactCheck” se nëse në strukturën e KFOR në veri të Kosovës do të kishte trupa amerikane nuk do të kishte vetëm të plagosur, por edhe të vrarë.

Duke vijuar më tej me shpjegimin e tij, Deliu tha se vendimi i Kurtit për të shoqëruar me polici 4 kryetarët në zyrat e tyre ka qenë i drejtë, pasi të zgjedhurve u rrezikohej jeta.

Në veriun e Kosovës policia ka pasur detyrë të shoqërojë dhe organizojë futjen e kryetarëve të zgjedhur në zyrat e tyre. Por, nisur dhe nga deklarata e Kurtit sipas informacioneve që ka pasur, e kanë detyruar që ai të marrë masat që kryetarët t’i shoqërojë me personel. Mendoj se ka qenë vendim i drejtë se i rrezikoj jeta këtyre kryetarëve. Policia është e tërhequr dhe KFOR ka kompetencat për të mbrojtur sigurinë dhe integritetin e Kosovës. Policia ushtron kompetencat e saj dhe këto vite forcat ndërkombëtare kanë trajnuar policinë e Kosovës.

KFOR ka pasur informacione se aty do të kishte dhunë, sulme që përdoren në protesta dhe këtë e tregon fakti që KFOR ka dërguar forcat hungareze dhe italiane që janë të mirëtrajnuar për menaxhimin e turmave dhe kishin mjetet e duhura.

Aty nuk kanë qenë thjesht protestues paqësor. Protestuesi paqësor nuk mban maskë, apo nuk hedh bomba molotov. Serbia ka ndikim në veriun e Kosovës.

E mendoj si lëvizje të zgjuar të komandantit të KFOR, vendosjen e forcave hungareze dhe italiane pasi Serbia ka marrëdhënie më të mira me Hungarinë sesa SHBA. Nëse do kishte forca amerikane në forcën e parë nuk do të kishte vetëm të plagosur por dhe të vrarë.