Qeveria japoneze u ofron familjeve 1 milion jen për fëmijë, vetëm për t’u larguar nga Tokio

Qeveria e Japonisë ofron 1 milion yen, ose rreth 7500 dollarë për fëmijë për familjet që shpërngulen nga Tokio e madhe, në një përpjekje për të rikthyer popullsinë në rajone të tjera që po zbrazen.

Megjithëse popullsia e Tokios ra për herë të parë vitin e kaluar, një prirje që i atribuohet pjesërisht pandemisë së koronavirusit, politikëbërësit besojnë se duhet bërë më shumë për të ulur dendësinë e popullsisë së qytetit dhe për të inkurajuar njerëzit të fillojnë jetë të re në pjesët “jo në modë” të vendit që janë goditur nga plakja, rënia e popullsisë dhe migrimi i të rinjve në Tokio, Osaka dhe qytete të tjera të mëdha.

Për të marrë përfitimet, familjet duhet të lëvizin jashtë zonës më të madhe të Tokios, megjithëse disa mund të marrin paratë nëse zhvendosen në zonat malore që shtrihen brenda kufijve të qytetit, tha agjencia e lajmeve Kyodo, duke cituar zyrtarët.

Rreth 1300 bashki, ose afërsisht 80% e totalit i janë bashkuar skemës, duke shpresuar të përfitojnë nga një ndryshim në qëndrimet e publikut ndaj cilësisë së jetës që mori vrull gjatë pandemisë, kur më shumë punëtorë zbuluan përfitimet e punës në distancë.

Megjithatë, familjet që shpresojnë të sigurojnë një pagesë të lehtë përpara se të kthehen në kryeqytet do të zhgënjehen. Ata duhet të jetojnë në shtëpitë e tyre të reja për të paktën pesë vjet dhe një anëtar i familjes duhet të jetë në punë ose të planifikojë të hapë një biznes të ri.

Ata që largohen para se të kenë kaluar pesë vjet do të duhet të kthejnë paratë.

Zyrtarët shpresojnë se shumat bujare të ofruara do të inkurajojnë familjet me fëmijë deri në 18 vjeç për të rigjallëruar rajonet dhe për të lehtësuar presionin mbi hapësirën dhe shërbimet publike në Tokio më të madhe, metropoli më i madh në botë me një popullsi prej rreth 35 milionë banorë.

Në parim, familjet që zhvendosen marrin 1-3 milion yen për familje me kusht që të plotësojnë një nga tre kriteret: punësimin në një kompani të vogël ose të mesme në zonën ku ata lëvizin, duke vazhduar në punët e tyre të vjetra nëpërmjet punës në distancë, ose duke filluar një biznes në shtëpinë e tyre të re.

Gjysma e parave do të vijnë nga qeveria qendrore dhe gjysma tjetër nga bashkitë lokale.

Qeveria shpreson se 10 mijë persona do të kenë lëvizur nga Tokio në zonat rurale deri në vitin 2027.