Një tragjedi u regjistrua mbrëmjen e së mërkurës në Tetovë të Maqedonisë së Veriut, ku një spital COVID, i ndërtuar muajt e fundit, u përfshi nga flakët duke i marrë jetën të paktën 14 personave.
Zjarri tashmë është shuar plotësisht, ndërsa ekziston frika se numri i viktimave mund të rritet. Spitali COVID ishte ndërtuar vetëm muajt e fundit, për të trajtuar pacientët e infektuar dhe materiali me të cilin ishte ndërtuar u përfshi shumë lehtë nga flakët duke u shkrumbuar tërësisht.
Kryeministri Edi Rama iu është bashkua mesazheve ngushëlluese për ngjarjen e rëndë, ku deri më tani flitet për 10 viktima. Përmes një statusi në ‘Facebook’ kreu i qeverisë ka ngushëlluar familjarët e viktimave, ndërsa e ka shoqëruar postimin dhe me një fjongo të zezë në shenjë zie.
Mirëmëngjes dhe duke u bashkuar me të gjithë ju në ngushëllimet më të ndjera për familjet e viktimave të tragjedisë së mbrëmshme në spitalin Covid të Tetovës, si edhe në përqafimin vëllazëror për krejt komunitetin tetovar dhe mbarë popullin e Maqedonisë së Veriut, ju uroj një ditë të qetë juve e gjithë familjeve tuaja.
Për ngjarjen e spitalit të Covid-19 nuk mungoi as reagimi i kreu të opozitës, Lulzim Basha ku nëpërmjet një postimi në Twitter e ka konsideruar ngjarjen tragjike, duke i shprehur ngushëllime familjarëve të viktimave dhe shërim të shpejtë të plagosurve.
Pikëlluese lajmet e hidhura qe vijnë nga Tetova. Në këtë ditë tragjike i bashkohem dhimbjes së familjarëve dhe të afërmve të viktimave e ju shpreh ngushëllimet më të sinqerta. Shërim të shpejtë të lënduarve. Lutemi për Tetovën!.
Nëpërmjet një mesazhi, edhe Presidenti Meta ka shprehur ngushëllimet e tij për familjarët e viktimave.
Me shqetësim dhe trishtim të thellë po përcjell tragjedinë e ndodhur në spitalin e Tetovës. Një ngjarje tepër e rëndë dhe tronditëse, veçanërisht për numrin e viktimave të raportuara! Shpreh ngushëllimet më të ndjera për jetët e humbura dhe ndaj dhembjen e madhe me familjarët e tyre. Ju uroj shërimin sa më parë të lënduarve! Shpreh solidaritetin e plotë me autoritetet shtetërore të Maqedonisë së Veriut, që po bëjnë përpjekje maksimale për të shpëtuar sa më shumë jetë dhe vënë nën kontroll situatën. Mendimet dhe lutjet e mia janë me Tetovën!
Ministrja e Jashtme, Olta Xhaçka ka shprehur ngushëllime për familjarët e viktimave që humbën jetën tragjikisht në “shpërthimin” e zjarrit në spitalin COVID në Tetovë.
Një ngushëllim ka shprehur edhe për të gjithë komunitetin shqiptar duke thënë se dhimbja e tyre është edhe e jona dhe anasjelltas.
Dhimbja juaj është dhimbja jonë, tragjedia juaj është tragjedia jonë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
