Ka mbërritur në Kuvend kërkesa e SPAK për arrestimin e ish-zv.kryeministrit Arben Ahmetaj. MCN Tv ka siguruar kërkesën e SPAK ku kërkohet një autorizim për heqje lirie dhe kontroll banese për Ahmetajn. Ish-zv.kryeministri akuzohet për fshehje të pasurisë, korrupsion pasiv të zyrtarëve të nivelit të lartë shtetëror dhe pastrim i produkteve të veprës penale ose veprimtarisë kriminale. Me kërkesën e SPAK, pritet që Parlamenti t'i hapë rrugë heqjes së imunitetit të deputetit të Ahmetajt, që lejon arrestimin e tij. “Duke qenë se hetimet në kuadrin e procedimit penal nr277/1 të vitit 2022 vazhdojnë në drejtim edhe të fakteve të tjera penale apo personave të tjerë të implikuar në ndodhjen e tyre, me qëllim respektimin e kuadrit ligjor procedurial penal mbi ruajtjen e sekretit hetimor, bazuar në nenin 73 të Kushtetutës së Republikës së Shqipërisë, kërkojmë që çdo procedurë që do të zhvillohet, në lidhje me këtë kërkesë, nga Kuvendi i Republikës së Shqipërisë Këshilli për Rregulloren, Mandatet dhe Imunitetin, të zhvillohet në seancë me dyer të mbyllura”, shkruhet në dokument. Ahmetaj është i dyshuar si i përfshirë në aferën e inceneratorëve. SPAK ka kryer më herët kontrolle në banesën e partneres së Arben Ahmetajt në Hamallaj dhe në vilën e ish-bashkëshortes së tij në Palasë. Të dyja këto banesa janë konfiskuar me urdhër të Prokurorisë së Posaçme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
