Vijon të rritet numri i serbëve që largohen nga Forca e Sigurisë së Kosovës. Deri më tani, mediat lokale në Prishtinë flasin për rreth 40 serbë që kanë paraqitur dorëheqjen në një kohë kur serbët përbëjnë 2% të trupave, numri i të cilave në total shkon në 4 mijë trupa aktive dhe 2 mijë e 500 rezervistë.
Burimet të cituara prej tyre bëjnë të ditur se autoritetet zyrtare po vijojnë negociatat me ta, për t'i bindur të rikthehen mes forcave të Sigurisë së Kosovës.
Vendimi i tyre për t'u larguar nga radhët e FSK-së, i kritikuar edhe nga ndërkombëtarët, erdhi pas thirrjeve nga Beogradi, me qëllimin e vetëm për të ndalur formimin e ushtrisë së Kosovës.
Për të arritur këtë, autoritetet në Prishtinë do të duhet të ndryshojnë Kushtetutën, për të cilën kërkohet edhe miratimi i deputetëve serbë në Kuvendin e Kosovës, të cilat janë deklaruar disa herë që nuk do ta mbështesin formimin e ushtrisë së Kosovës.
Udhëheqësit e institucioneve të Kosovës kanë paralajmëruar se shndërrimi i FSK-së në ushtri do të bëhet përmes një ligji të veçantë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
