Princesha japoneze heq dorë nga titulli për dashurinë, çfarë po ndodh me familjen perandorake

Princesha japoneze Mako, më e madhja nga mbesat e perandorit Akihito, do të heqë dorë nga statusi  mbretëror për t’u martuar me një ish-shok klase.

Mediat japoneze shkruajnë se kjo martesë do ta rrudhë familjen mbretërore, pasi sapo ajo të kryhet, princesha nuk do të gëzojë asnjë nga privilegjet që i jep statusi.

Kabineti qeveritar pritet të aprovojë një ligj të premten, i cili i jep të drejtë akihitos 83-vjeçar të heqë dorë nga froni, çka do të përbënte abdikimin e parë në 200 vitet e fundit për një perandor japonez.

Miratimi i ligjit vjen pas deklaratës së vetë perandorit në fund të vitit të kaluar, kur ai u shpreh se mosha e thyer i krijonte pasiguri për përmbushjen e detyrës së tij.

Por në ligj nuk do të jepet hapësirë për çështjen e shumëdebatuar të trashëgimtarëve të fronit, një lëvizje që konservatorët druajnë se do të bëhet hapi i parë drejt lejimit të femrave për ta trashëguar atë.

I pyetur në lidhje me mungesën e trashëgimtarëve, shefi i kabinetit, Yoshihide Suga, është shprehur në një konferencë shtypi se “nuk ka asnjë ndryshim në qëndrimin tonë për t’i dhënë vendit trashëgimtarë të fronit që garantojnë stabilitetin e perandorisë”.

Në Japoni janë vetëm katër trashëgimtarët e fronit: dy djemtë në moshë të mesme (dhe me gra mbi 50 vjeçe) të perandorit Akihito, vëllai tetëdhjetëvjeçar i këtij të fundit dhe princi Hisahito, nipi 10 vjeçar.

Akihito ka vetëm 1 nip dhe 3 mbesa. Rrudhja e familjes mbretërore, që pasqyron edhe rënien e numrit të popullsisë japoneze, ka shtuar hamendësimet se princi më i vogël mund të jetë i fundit në familjen mbretërore. / The Independent / G.S. /