Thirrja e MAS: Mbani temperatura konstante dhe ajrosni klasat, prioritet shëndeti i nxënësve

Temperaturat e ulëta në vend dhe pandemia janë parë nga Ministria e Shëndetësisë si problematike për mbarëvajtjen e mësimit në shkolla.

Në një njoftim zyrtar, Ministria e Arsimit i bën thirrje institucioneve të ruajnë një temeperaturë konstante në klasa dhe të ajrosin 5-6 herë në ditë ambientet ku zhvillohet mësimi, në pamundësi për të mbajtur gjithë kohës dritaret e hapura për shkak të ngricave dhe temperaturave të ulëta.

NJOFTIMI I PLOTË
Shëndeti i nxënësve dhe stafit mësimor është prioritet kryesor i Ministrisë së Arsimit, Sportit dhe Rinisë.

Prandaj, duke marrë shkas nga temperaturat e ulëta në të gjithë vendin, si dhe shqetësimet e drejta të prindërve, ndiejmë të nevojshme të nënvizojmë se Udhëzuesi për fillimin e vitit shkollor 2020-2021, në respekt të udhëzimeve të MSHMS, duke marrë parasysh edhe ndryshimet e temperaturave sipas stinëve, nuk kërkon në mënyrë absolute mbajtjen hapur gjatë gjithë kohës të dritareve, por lejon edhe ajrosjen e klasave disa herë gjatë ditës.
Më saktësisht, në të shprehet qartë se: “DRITARET DUHET TË MBAHEN TË HAPURA OSE TË PAKTËN TË AJROSEN 5-6 HERË GJATË KOHËS SË MËSIMIT”.
Prandaj kërkojmë nga të gjitha Institucionet Arsimore që të kenë në vëmendje zbatimin e këtij udhëzimi, duke u kujdesur maksimalisht edhe për mbajtjen e një temperature konstante në klasë, me qëllim mbrojtjen e shëndetit të nxënësve dhe mësuesve.