Takimi i parë si President i zgjedhur, Begaj pritet nga ambasadori britanik në Shqipëri

Presidenti i zgjedhur Bajram Begaj, ka zhvilluar sot takimet e para pasi u votua në Kuvend si kryetar shteti.

Ai takoi ambasadorin britanik në Shqipëri Alastair King-Smith dhe të Dërguarin e Posaçëm për Ballkanin Perëndimor, Stuart Peach.

Këta të fundit vlerësuan qëllimin e Begajt për t’i shërbyer interesave afatgjata të popullit shqiptar.

Përmes një deklarate ambasadori Alastair King-Smith shprehet:

Diskutuam rëndësinë e sigurisë rajonale, duke adresuar rritjen e çmimeve të energjisë dhe ushqimeve dhe garantimin e standardeve më të larta në detyrat publike dhe emërimet. I dërguari i Posacëm, Sir Stuart Peach, ndodhet në vizitë dy ditore në Shqipëri me synimin për të përforcuar angazhimin e Britanisë për të bashkëpunuar me udhëheqësit shqiptarë dhe liderët e tjerë, për të promovuar në të gjithë rajonin institucione të forta demokratike dhe shoqëri të hapura. Si aleatë të ngushtë, do të angazhohemi me Presidentin e zgjedhur Begaj që Mbretëria e Bashkuar dhe Shqipëria të adresojnë sfidat e përbashkëta dhe të krijojnë mundësi të reja bashkëpunimi për të dyja vendet tona".