Drejtoria e Përgjithshme e Arkivave, solli sot në vëmendje 20 marsin e vitit 1920, datë kur lindi në Elbasan Qemal Stafa. Në vendlindje do qëndronte fare pak, pasi në moshën 3-vjeçare u zhvendos me familjen drejt Shkodrës, shtrënguar prej detyrimeve të zakonta të shërbimit, që parashikon rroba ushtarake e mbajtur prej Hasanit, të atit të Qemalit.
Mësimet fillore, Stafa i ndoqi në Kolegjin Saverian të Etërve Jezuitë deri në vitin 1933, kohë kur nisi të zbatohej “Reforma Ivanaj”, e cila çoi në kyçjen e shkollave private dhe klerikale.
Në këto kushte do të vijonte edukimin në gjimnazin e Shkodrës. Pasi humbi të atin në verën e vitit 1936, shpërngulet drejt Tiranës, ku regjistrohet në gjimnazin shtetëror.
Më 24 janar 1939, do të arrestohej dhe togat e zeza do ta shpallnin të fajshëm “për veprimtari subversive komuniste”, së bashku me 73 të pandehur të tjerë. Dënohet me tre vjet burgim, por arrin të lirohet më 7 prill, në valën e trazirave në vend.
Stafa ishte një prej themeluesve të grupit komunist të Shkodrës, anëtar i Komitetit Qendror, sekretar politik i të rinjve dhe kandidat për Sekretar i Përgjithshëm i Partisë Komuniste të Shqipërisë.
Gjithashtu, nën pseudonimin letrar “Brutus”, shkroi poezi dhe përmbajtje letrare që u përmblodhën në vëllimin “Qortimet e vjeshtës”. Më 5 maj 1942 mbeti i vrarë në një lagje periferike të Tiranës.
Drejtoria e Përgjithshme e Arkivave publikoi sot një fotografi të Qemal Stafës së bashku me një grup partizanësh.
Ndërsa, në dokumentet bashkëlidhur paraqitet një dorëshkrim i tij me titull “Qëllimi ynë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
