Xi Jinping premton ‘ribashkim’ të Tajvanit me Kinën

Presidenti i Kinës, Xi Jinping, është zotuar se do të realizojë "ribashkimin" me Tajvanin, pa përmendur përdorimin e forcës, pas një jave tensionesh.

Tajvani u përgjigj menjëherë duke përsëritur se vetëm njerëzit e Tajvanit mund të vendosin për të ardhmen e tyre.

Tajvani i drejtuar në mënyrë demokratike është vënë nën presion të shtuar ushtarak dhe politik për të pranuar sovranitetin e Pekinit, por Tajvani thotë se është një vend i pavarur, duke përdorur emrin e tij formal: Republika e Kinës.

Duke folur në Sallën e Madhe të Popullit të Pekinit të Shtunën, Xi tha se populli kinez kishte një "traditë e lavdishme" të kundërshtimit të separatizmit.

"Separatizmi i pavarësisë së Tajvanit është pengesa më e madhe për arritjen e ribashkimit të atdheut dhe rreziku më serioz i fshehur për përtëritje kombëtare," tha ai në përvjetorin e revolucionit që përmbysi dinastinë e fundit perandorake të Kinës në 1911.

Xi tha se "ribashkimi përmes një mënyre paqësore është më në përputhje me interesin e përgjithshëm të kombit kinez, përfshirë bashkatdhetarët e Tajvanit", por shtoi se Kina do të mbrojë sovranitetin dhe unitetin e saj.

Ndërkohë zyra presidenciale e Tajvanit tha se ata ishin një vend sovran i pavarur, jo pjesë e Republikës Popullore të Kinës.

Në një deklaratë të veçantë, Këshilli i Çështjeve të Kontinentit të Tajvanit për politikëbërjen e Kinës i bëri thirrje Pekinit të "braktisë hapat e tij provokues të ndërhyrjes, ngacmimit dhe shkatërrimit" dhe të kthehet në bisedime.