“Xhadat” nis sezonin e ri- Konflikti për pronën, polici i përfshirë tenton të shtypë gazetarin

Emisioni investigativo- satirik “Xhadat” nisi të hënën e 9 shtatorit sezonin e ri. Ashtu si dhe në dy sezonet e kaluara, ndjekja e denoncimeve të qytetarëve, janë puna e përditshme e gazetarëve. Konfliktet për pronën, kanë qenë gjithmonë në krye të listës së halleve të shqiptarëve.

Një denoncim i tillë u bë pak kohë më parë edhe në emisionin “Xhadat”. Dashnor Toska, nga fshati Krekëz i Kuçovës akuzonte vëllain e tij Vladimir Toska, për zaptimin e tokës që kishte me certifikatë pronësie, për të cilën paguante rregullisht dhe taksat në bashki.

Sipas tij, konfliktet e përsëritura kishin përfunduar në dhunë verbale e fizike mes anëtarëve të familjes, ndërsa Komisariati i Policisë Kuçovë nuk kishte vepruar, pasi i vëllai dhe nipi i tij dhunues ishin njëri ish-polic e tjetri polic në detyrë.

Qelibare Toska, nusja e djalit të denoncuesit, përmes një interviste tregoi se si Devi Toska, e kishte kërcënuar me armë, dhe goditur me tytën e pistoletës, por i kishte shpëtuar dënimit për shkak të amnistisë.

Dhuna e faktuar përmes videove kishte arritur deri te fëmijët e vegjël të familjes.

Familja e Dashnor Toskës, u shpreh se ndihen të frikësuar për jetën. Pasi konfirmuan nga ana e Bashkisë Kuçovë përmes një bisede me topografin se toka ku po ndodhte konflikti sipas matjeve dhe certifikatës së pronësisë i përkiste denoncuesit, “Xhadat” ju drejtuan Komisariatit të Policisë Kuçovë.

Policia regjistroi kallëzimin e denoncuesit, ndërsa në ambientet e komisariatit brenda një makine me xhama të zinj u shfaq dhe Devi Toska, polici që përmes dhunës mban peng pronën e xhaxhait të tij.

Kërcënimet e tij kësaj here ishin nga brenda makinës, me të cilën fillimisht kërkoi të frikësoj stafin e “Xhadave”, duke ju afruar gati për t’i shtypur, e më pas po të njëjtin veprim bëri dhe para Komisariatit të Policisë, duke mos ju bindur urdhrit të shefit të rendit, për të dalë nga makina e për të dhënë sqarime rreth dhunës së ushtruar nga ana e tij dhe veprimeve arbitrare të kryera ndaj grupit të xhirimit të emisionit.

Pas denoncimit Komisariati i Policisë Kuçovë, nisi menjëherë në familjen Toska, një grup për verifikimin e situatës dhe premtoj marrjen e masave në lidhje me konfliktin, i cili në çdo rast duhet parandaluar.