Kryeministri Edi Rama vendos ngritjen e një ministrie të re dhe propozon emërimin e Arben Ahmetajt.
Bëhet fjalë për ngritjen e Ministrisë së Shtetit për Rindërtimin, në krye të së cilës është propozuar ish-ministri i Financave, Arben Ahmetaj.Ai ka vendosur që të krijojë një ministri të re, për tu marrë vetëm me rindërtimin e zonave të prekura nga tërmeti i 26 nëntorit.
‘Programi i Rindërtimit dikton hapjen e një vendi të posaçëm edhe në tryezën e Këshillit të Ministrave, ku një ministër i ngarkuar ekskluzivisht me koordinimin e të gjitha institucioneve vendase e ndërkombëtare që lidhen me këtë program, të ndjekë orë e minutë zbatimin e Programit’, shkruan Rama.
Arben Ahmetaj do të jetë ministër i Rindërtimit në qeverinë e drejtuar nga Edi Rama.
Pas publikimit të kërkesës nga Rama, ka reaguar presidenca.
‘Asnjë sekondë vonesë për dekretimin e ministrit të ri të Shtetit për Rindërtimin’, shkroi në Facebook zëdhënësi i presidentit, Tedi Blushi.
Ndërkohë, dekreti i Metës erdhi pak orë më pas.
Aktualisht Arben Ahmetaj kryeson Komitetin Kombëtar të Rindërtimit, që ka për qëllim menaxhimin e situatës dhe rindërtimin e zonave të goditura nga tërmeti shkatërrues i 26 nëntorit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
