Vatra e zjarrit, e aktivizuar prej së enjtes në Qafën e Llogarasë, është shuar. Ministri i Mbrojtjes, Niko Peleshi paralajmëron qytetarët se do të përballen me ligjin nëse vënë në rrezik pasurinë kombëtare.
“Një thirrje për të gjithë ata banorë, që me veprimet e tyre vënë në rrezik pasurinë kombëtare: Do të përballen më ligjin, i cili është i qartë dhe i rreptë për piromanët!”, ka thënë ministri i Mbrojtjes.
Për shuarjen e flakëve u angazhuan forcat zjarrfikëse, Forcat e Armatosura, Administrata e Zonave të Mbrojtura, nën koordinimin e Agjencisë së Mbrojtjes Civile.
Mbi 40 efektivë të tjerë nga Forcat e Armatosura iu bashkuan aksionit në orët e para të mëngjesit dhe po bëjnë krehjen e zonës, për izolimin përfundimtar të vatrës.
Më herët drejtori i Përgjithshëm i Zjarrëfikses, Arben Ceka, në një prononcim për median tha se zjarri ka qenë i qëllimshëm.
Vatrat e zjarrit patjetër që kanë dorën e njeriut. Nuk do të ketë asnjë lloj tolerimi. Zjarri do të hetohet dhe policia e shtetit është duke gjurmuar autorët e zjarrvënies. Së shpejti do të jenë para ligjit ku dhe do të jetë shumë i ashpër. Kodi Penal e ka përcaktuar që zjarrvënia është vepër penale e ne nuk do të ndalemi bashkë me policinë që këto zjarrvënës të japin llogarinë për këtë katastrofë natyrore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
