Vjedhja e makinave, 5 raste në plazhin e Durrësit

Që prej nisjes së sezonit turistik, në zonën e plazhit të Durrësit janë regjistruar 5 raste të vjedhjes së automjeteve. Markat e synuara janë kryesisht BMW dhe Mercedes Benz, të cilave dyshohet se pasi iu ndryshohet numri i shasisë tregtohen në vendet e rajonit ose përfundojnë për pjesë këmbimi nëpër serviset e vendit.

Bujari, është shqiptar i Maqedonisë. Makina e babait të tij u vodh në sheshpushimin e pallatit ku po kalojnë pushimet. “Nga ora 10.00 e mëngjesit kemi konstatuar se makina nuk është këtu. Rastin e kemi denoncuar në policinë e plazhit, po akoma nuk kemi asnjë informatë se ca do bëhet. Nga vjedhësit e makinave nuk ka asnjë gjurmë se zona përreth nuk ka kamera, dhe policia thotë nuk kemi ça të bëjmë ne”, thotë Bujari.

Bujari nuk është i vetmi pasi gjatë sezonit turistik janë denoncuar 5 raste vjedhjesh të makinave në policinë e Durrësit. Të dëmtuarit shprehen se efektivët e policisë nuk po punojnë sa duhet për zgjidhjen e problemit, raporton Top Channel. 

“Lajmërova policinë  i rashë mbi 10 herë, asnjëherë nuk përgjigjet policia. Kam vajt shumë herë në polici, tëshohim thonë, deri tani ka një muaj asnjë gjë hiç. Vetë me mënyrat e mia i kam çuar kamerat, më thonë nuk zbulohet”, thotë një tjetër pushues.

“Ne kemi pasur një celular brenda që ka qënë në gjendje deri mbrëmë, po policia nuk besoj se e ka bërë punën e vetë për celularin që ka qënë në makinë”, tha më tej Bujari nga Maqedonia.